அரசியல் எதிரிகளை அச்சுறுத்துவது, அவர்களை மக்களை சந்திக்க விடாமல் தடுப்பது அல்லது தாக்குதல் போன்ற வன்முறை சம்பவங்களில் ஈடுபடுவது ஜனநாயகத்தின் அடிப்படை மாண்புகளுக்கு எதிரானது என தவெக சட்டமன்ற உறுப்பினர் கனிமொழி சந்தோஷ் MLA கடும் கண்டனம் தெரிவித்துள்ளார். அமைச்சர் சம்பத் மீது தாக்குதல் நடத்தப்பட்டதாக வெளியான தகவல்களைத் தொடர்ந்து அவர் இந்த கண்டனத்தை வெளியிட்டுள்ளார்.
அரசியல் என்பது கருத்துக்களுக்கான ஒரு களம் என்றும், அந்தக் களத்தில் கருத்து வேறுபாடுகள் இருக்கலாம் என்றும், கொள்கை ரீதியாக கடுமையான விமர்சனங்களும் இருக்கலாம் என்றும் கனிமொழி MLA குறிப்பிட்டுள்ளார். ஆனால், அதற்கு பதிலாக வன்முறையைத் தேர்ந்தெடுப்பது ஒருபோதும் ஏற்றுக்கொள்ளக்கூடிய அரசியல் நடைமுறை அல்ல என்றும் அவர் வலியுறுத்தியுள்ளார்.
ஒரு அரசியல் கட்சியின் நிர்வாகி, வேட்பாளர் அல்லது மக்கள் பிரதிநிதி மக்களை சந்திக்கச் செல்லும்போது, அவரை தடுத்து நிறுத்துவது, அச்சுறுத்துவது அல்லது ஆதரவாளர்கள் மூலம் தாக்குதல் நடத்துவது போன்ற செயல்கள் ஜனநாயக அரசியலின் அடிப்படை நெறிமுறைகளையே கேள்விக்குள்ளாக்குகின்றன என்பதை அவர் சுட்டிக்காட்டினார்.
குறிப்பாக தேர்தல் காலத்தில் ஒவ்வொரு அரசியல் கட்சிக்கும் மக்களை நேரடியாக சந்தித்து தங்களது கொள்கைகள் மற்றும் நிலைப்பாடுகளை எடுத்துரைக்கும் உரிமை உள்ளது. அதேபோல், அந்தக் கருத்துக்களை ஏற்றுக்கொள்வதா, நிராகரிப்பதா என்பதை தீர்மானிக்கும் முழுமையான உரிமை மக்களுக்கு மட்டுமே உள்ளது என்றும் அவர் கூறியுள்ளார்.
மக்களை சந்திப்பதற்கான அரசியல் களத்தை வன்முறையின் மூலம் முடக்க முடியாது என்றும், தங்களது ஆதரவாளர்களை பயன்படுத்தி மக்களை சந்திக்க விடாமல் தடுப்பதும், அவர்களை அச்சுறுத்துவதும், தாக்குதல்களில் ஈடுபடுவதும் அரசியல் மாண்பு அல்ல என்றும் கனிமொழி MLA தெரிவித்துள்ளார்.
அதிமுக மற்றும் திமுக போன்ற அரசியல் கட்சிகள் தேர்தல் களத்தில் போட்டியை ஜனநாயக ரீதியாக எதிர்கொள்ள வேண்டும் என்றும், அரசியல் போட்டி என்பது கொள்கைகளுக்கு இடையிலான போட்டியாக இருக்க வேண்டும் என்றும், தனிநபர்கள் மீது நடத்தப்படும் தாக்குதலாக மாறிவிடக்கூடாது என்றும் அவர் அறிவுறுத்தியுள்ளார்.
கொள்கையை கொள்கையால் எதிர்கொள்ளுங்கள் என்றும், மக்களின் தீர்ப்பை மக்களிடமே விட்டுவிடுங்கள் என்றும் அவர் கேட்டுக்கொண்டார். வன்முறை மூலம் மக்களின் மனதை மாற்ற முடியாது என்றும், அச்சுறுத்தல்கள் மூலம் ஜனநாயகத்தின் குரலை ஒடுக்க முடியாது என்றும் அவர் திட்டவட்டமாக கூறியுள்ளார்.
தேர்தல் களத்தில் யார் வெற்றி பெற வேண்டும் என்பதை எந்த அரசியல் கட்சியும் தீர்மானிக்க முடியாது என்றும், மக்கள்தான் இறுதி தீர்ப்பை வழங்குபவர்கள் என்றும் அவர் தெளிவுபடுத்தினார். எனவே, அரசியல் களத்தில் போட்டியிடுங்கள்; ஆனால் வன்முறையை அரசியல் கருவியாக மாற்றாதீர்கள் என்றும் அவர் எச்சரித்துள்ளார்.
மக்களின் குரலாகவும், மக்களின் உரிமைக்காகவும் தவெக தொடர்ந்து ஜனநாயக களத்தில் நிற்கும் என்றும் கனிமொழி MLA திட்டவட்டமாக தெரிவித்துள்ளார்.
