மும்பை: அயர்லாந்து, இங்கிலாந்து டி20 தொடர்கள் மற்றும் ஆசிய விளையாட்டுப் போட்டிகளுக்கான இந்திய அணிகளை பிசிசிஐ இன்று (ஜூன் 6) அதிகாரப்பூர்வமாக அறிவித்துள்ளது. இந்த அணிகளுக்கு புதிய கேப்டனாக ஸ்ரேயாஸ் ஐயர் நியமிக்கப்பட்டுள்ளார்.
சமீபத்தில் நடைபெற்ற டி20 உலகக் கோப்பையை வென்ற சூர்யகுமார் யாதவ், அவரது மோசமான ஆட்டத்திறன் காரணமாக கேப்டன் பதவியில் இருந்தும், அணியில் இருந்தும் நீக்கப்பட்டுள்ளார். அவருக்குப் பதிலாக, ஐபிஎல் தொடரில் சிறப்பாக செயல்பட்ட ஸ்ரேயாஸ் ஐயர் புதிய கேப்டனாகப் பொறுப்பேற்றுள்ளார். மேலும், மும்பை இந்தியன்ஸ் அணியின் இளம் வீரர் திலக் வர்மா புதிய துணை கேப்டனாக நியமிக்கப்பட்டுள்ளார். நீண்ட கால அடிப்படையில் இந்திய அணியை வழிநடத்தும் இளம் வீரர்களை உருவாக்கும் நோக்கில் இந்த முக்கியப் பொறுப்பு வழங்கப்பட்டுள்ளது.
அயர்லாந்து, இங்கிலாந்து தொடருக்கான இந்திய அணி: ஸ்ரேயாஸ் ஐயர் (கேப்டன்), அபிஷேக் சர்மா, சஞ்சு சாம்சன், இஷான் கிஷன், சிவம் துபே, திலக் வர்மா (துணை கேப்டன்), நிதிஷ் ரெட்டி, அக்சர் படேல், வாஷிங்டன் சுந்தர், வருண் சக்கரவர்த்தி, முகமது சிராஜ், அர்ஷ்தீப் சிங், பிரின்ஸ் யாதவ், வைபவ் சூர்யவன்ஷி. ஆசிய விளையாட்டுப் போட்டிக்கான இந்திய அணி: ஸ்ரேயாஸ் ஐயர் (கேப்டன்), வைபவ் சூர்யவன்ஷி, அபிஷேக் சர்மா, சஞ்சு சாம்சன், இஷான் கிஷன், சிவம் துபே, திலக் வர்மா (துணை கேப்டன்), நிதிஷ் குமார் ரெட்டி, அக்சர் படேல், வாஷிங்டன் சுந்தர், வருண் சக்கரவர்த்தி, ரவி பிஷ்னோய், ஹர்ஷித் ராணா, அர்ஷ்தீப் சிங், ஜஸ்பிரித் பும்ரா.
இந்த அணியில் மிகப்பெரிய ஆச்சரியமாக, பீகாரைச் சேர்ந்த 15 வயது இடதுகை பேட்ஸ்மேன் வைபவ் சூர்யவன்ஷி முதல்முறையாகத் தேர்வு செய்யப்பட்டுள்ளார். ஐபிஎல் 2026 தொடரில் ராஜஸ்தான் ராயல்ஸ் அணிக்காக விளையாடி 776 ரன்கள் குவித்து ஆரஞ்சு தொப்பியை வென்ற வைபவ், இந்திய டி20 அணியில் விளையாட உள்ள மிக இளம் கிரிக்கெட் வீரர் என்ற சாதனையைப் படைக்க உள்ளார். அறிவிக்கப்பட்டுள்ள இரண்டு அணிகளுமே இளமையும் அனுபவமும் கலந்த சிறந்த சமநிலையுடன் காணப்படுகின்றன. ஆல்-ரவுண்டர்களாக சிவம் துபே, நிதிஷ் குமார் ரெட்டி, அக்சர் படேல் மற்றும் வாஷிங்டன் சுந்தர் ஆகியோர் பலம் சேர்க்கின்றனர். சுழற்பந்து வீச்சில் வருண் சக்கரவர்த்தி, ரவி பிஷ்னோய், வேகப்பந்து வீச்சில் முகமது சிராஜ், அர்ஷ்தீப் சிங், ஹர்ஷித் ராணா மற்றும் பிரின்ஸ் யாதவ் ஆகியோர் தேர்வு செய்யப்பட்டுள்ளனர். ஆசிய விளையாட்டுப் போட்டிக்கான அணியில் முன்னணி வேகப்பந்து வீச்சாளர் ஜஸ்பிரித் பும்ரா சேர்க்கப்பட்டுள்ளது அணிக்கு கூடுதல் பலம் சேர்த்துள்ளது.
