மகளிர் டி20 உலகக் கோப்பை 2026 கிரிக்கெட் தொடரில் பெரும் எதிர்பார்ப்பை ஏற்படுத்தியுள்ள இந்தியா மற்றும் பாகிஸ்தான் மகளிர் அணிகளுக்கு இடையேயான லீக் போட்டி ஜூன் 14 அன்று பிர்மிங்ஹாமில் உள்ள எட்க்பாஸ்டன் மைதானத்தில் நடைபெற உள்ளது. ஒருநாள் உலகக் கோப்பையை வென்ற உற்சாகத்தில் இருக்கும் இந்திய அணி, இந்த டி20 உலகக் கோப்பை தொடரையும் வெற்றியோடு தொடங்க தயாராகி வருகிறது.
சர்வதேச டி20 கிரிக்கெட் போட்டிகளில் இரு அணிகளும் இதுவரை மோதியுள்ளதில் இந்திய அணியின் ஆதிக்கமே அதிகமாக உள்ளது. இதுவரை விளையாடியுள்ள போட்டிகளில் இந்தியா 13 முறையும், பாகிஸ்தான் 3 முறையும் வெற்றி பெற்றுள்ளன. கடைசியாக 2024 டி20 உலகக் கோப்பையில் துபாயில் நடந்த மோதலில் இந்திய அணி 6 விக்கெட் வித்தியாசத்தில் அபார வெற்றி பெற்றது.
இந்திய அணியின் கேப்டனாக ஹர்மன்பிரீத் கவுர் உள்ளார். ஸ்மிருதி மந்தனா மற்றும் ஷஃபாலி வர்மா ஆகியோர் தொடக்க வீராங்கனைகளாக களமிறங்கி அதிரடி காட்டக் காத்திருக்கின்றனர். இந்திய அணியில் காயம் காரணமாக அமன்ஜோத் கவுர் மற்றும் காஷ்வி கவுதம் ஆகியோர் விளையாடாதது சற்று பின்னடைவாகக் கருதப்படுகிறது. மறுபுறம், பாகிஸ்தான் அணியின் கேப்டன் பாத்திமா சனா மிகச் சிறந்த ஃபார்மில் உள்ளார். கடந்த ஒரு ஆண்டில் பேட்டிங்கில் 50-க்கும் மேல் சராசரியும், பந்துவீச்சில் 25-க்கும் கீழ் சராசரியும் கொண்டு ஆல்-ரவுண்டராக அசத்தி வருகிறார். இவர் கராச்சியில் ஜிம்பாப்வே அணிக்கு எதிராக வெறும் 15 பந்துகளில் அதிவேக அரைசதம் அடித்து சாதனை படைத்தவர் என்பது குறிப்பிடத்தக்கது.
இந்தியா மற்றும் பாகிஸ்தான் மகளிர் அணிகளுக்கு இடையேயான இந்த டி20 உலகக்கோப்பை போட்டி ஜூன் 14 ஞாயிற்றுக்கிழமை அன்று இந்திய நேரப்படி இரவு 7:00 மணிக்கு தொடங்குகிறது. டாஸ் போடும் நிகழ்வு மாலை 6:30 மணிக்கு நடைபெறும். இப்போட்டியை தொலைக்காட்சியில் நேரடியாகப் பார்க்க விரும்பும் ரசிகர்கள் ஸ்டார் ஸ்போர்ட்ஸ் சேனலில் காணலாம். மொபைல் மற்றும் இணையதளத்தில் நேரலையாகப் பார்க்க விரும்புபவர்கள் ஜியோ ஹாட்ஸ்டார் செயலி மற்றும் இணையதளத்தைப் பயன்படுத்தலாம்.
