இந்தியா மற்றும் ஆப்கானிஸ்தான் அணிகளுக்கு இடையேயான முதல் டி20 கிரிக்கெட் போட்டி டெல்லி அருண் ஜெட்லி மைதானத்தில் இன்று (செப்டம்பர் 13) நடைபெறவுள்ளது. இந்த போட்டிக்கு முன்னதாக, ஆப்கானிஸ்தான் அணியின் கேப்டன் இப்ராஹிம் சத்ரான் செய்தியாளர் சந்திப்பில் பேசினார். காயத்திலிருந்து மீண்டு வந்துள்ள இந்திய அணியின் முன்னணி வேகப்பந்து வீச்சாளர் ஜஸ்பிரித் பும்ராவை எதிர்கொள்ள தங்களிடம் ஒரு வலுவான திட்டம் உள்ளதாக அவர் தெரிவித்தார்.
பும்ரா உலகின் தலைசிறந்த பந்துவீச்சாளர் என்றும், தனக்கு மிகவும் பிடித்தமான வீரர் என்றும் இப்ராஹிம் சத்ரான் குறிப்பிட்டார். அவரை எதிர்கொள்வதற்காக ஒரு சிறந்த திட்டத்தை வகுத்துள்ளதாகவும், விஷயங்களைச் சிக்கலாக்காமல் எளிமையாக அணுகி, பும்ரா மற்றும் இந்திய அணிக்கு எதிராகச் சிறப்பான ஆட்டத்தை வெளிப்படுத்துவோம் என்ற முழு நம்பிக்கை இருப்பதாகவும் அவர் கூறினார்.
இளம் வீரர் வைபவ் சூர்யவன்ஷி குறித்துப் பேசிய கேப்டன், அவர் ஒரு அற்புதமான திறமைசாலி என்றும், ஐபிஎல் தொடரில் அவருக்கு எதிராக விளையாடிய தங்கள் அணி வீரர்களிடம் இருந்து பல்வேறு தகவல்களைப் பெற்றுள்ளதாகவும் தெரிவித்தார். அவரது பேட்டிங் வீடியோக்களையும் தீவிரமாக ஆய்வு செய்து, சரியான நேரத்தில் திட்டங்களைச் செயல்படுத்தத் தயாராக இருப்பதாகவும் அவர் கூறினார்.
இந்திய ஆடுகளங்கள் தங்களுக்கு மிகவும் பரிச்சயமானது என்றும், அவர்கள் இந்தியாவில் உலகக் கோப்பை உள்ளிட்ட பல போட்டிகளில் விளையாடியுள்ளதாகவும் சத்ரான் குறிப்பிட்டார். கடந்த 2024-ல் பெங்களூருவில் நடந்த போட்டியில், இரண்டு சூப்பர் ஓவர்கள் வரை சென்று இந்தியாவுக்குக் கடுமையான சவால் அளித்ததை அவர் நினைவு கூர்ந்தார். தற்போது அணியில் உள்ள அனைத்து வீரர்களும் காயங்கள் ஏதுமின்றி முழு உடற்தகுதியுடன் இருப்பதாகவும் அவர் தெரிவித்தார்.
ரஷித் கானுக்குப் பதிலாக டி20 கேப்டன் பொறுப்பை ஏற்றுள்ள இப்ராஹிம் சத்ரான், புதிய பயிற்சியாளர் ரிச்சர்ட் பைபஸின் வழிகாட்டுதலில் அணி சிறப்பாக முன்னேறி வருவதாகவும் கூறினார். இந்தியாவை அதன் சொந்த மண்ணிலேயே வீழ்த்தி வரலாற்று வெற்றி பெற முழு முயற்சி எடுப்போம் என்றும் அவர் நம்பிக்கை தெரிவித்தார்.
இந்தத் தொடரில் மொத்தம் மூன்று டி20 போட்டிகள் நடைபெற உள்ளன. ஆப்கானிஸ்தான் அணி இந்த தொடரை இந்தியாவில் நடத்துகிறது. டெல்லி அருண் ஜெட்லி மைதானத்தில் இந்த மூன்று போட்டிகளும் நடைபெற உள்ளன. இந்த தொடரின் முதல் போட்டி இன்று நடைபெறுகிறது.
இந்தியா – ஆப்கானிஸ்தான் முதல் டி20 போட்டி மழையால் பாதிக்கப்படுமா என்ற கேள்வியும் எழுந்துள்ளது. டெல்லி வானிலை நிலவரம் போட்டி நடைபெறுமா என்பதை தீர்மானிக்கும். 138 ஆண்டுகளில் இப்படி நடந்ததே இல்லை என்ற ஒரு விசித்திரமான டெஸ்ட் சாதனை பாகிஸ்தான் மற்றும் இங்கிலாந்து அணிகள் சேர்ந்து படைத்துள்ளன.
