விமானங்கள் காற்றில் நிலைதடுமாறி விபத்துக்குள்ளாவதைத் தடுக்கும் ஒரு புரட்சிகரமான புதிய தொழில்நுட்பத்தை சென்னை ஐ.ஐ.டி ஆராய்ச்சியாளர்கள் கண்டுபிடித்துள்ளனர். 'மார்பிங் ஸ்கின்' என்று பெயரிடப்பட்டுள்ள இந்த இறக்கை நுட்பம், எரிபொருள் பயன்பாட்டையும் பெருமளவில் குறைக்கும் என எதிர்பார்க்கப்படுகிறது.
பறவைகளின் சிறகு அமைப்பிலிருந்து உத்வேகம் பெற்று, இந்த நவீன தொழில்நுட்பம் உருவாக்கப்பட்டுள்ளது. விமானங்கள் காற்றில் பறக்கும்போது ஏற்படும் 'ஏரோடைனமிக் ஸ்டால்' எனப்படும் ஆபத்தான நிலைதடுமாற்றத்தைத் தடுக்க இது உதவும். சென்னை ஐ.ஐ.டி-யின் பயன்முறை பயன்பாட்டு மற்றும் உயிரியல் மருத்துவப் பொறியியல் துறையின் இணைப் பேராசிரியர் டாக்டர் ரிங்கு முகர்ஜி தலைமையிலான ஆராய்ச்சிக் குழுவினர் இந்த நுட்பத்தை வெற்றிகரமாக உருவாக்கி, சோதித்துள்ளனர்.
பொதுவாக, விமானங்கள் உயரே பறக்கும்போதும் அல்லது தரையிறங்கும்போதும் அதன் இறக்கைகளில் காற்றோட்டம் தடைபடும்போது ‘ஸ்டால்’ எனப்படும் ஆபத்து உருவாகி, விமானம் மேலெழும் ஆற்றலை இழந்து கீழே விழக்கூடும். ஆனால், இயற்கை வழியிலான பறவைகளின் நெகிழ்வுத்தன்மையைப் பின்பற்றி உருவாக்கப்பட்டுள்ள இந்தச் சிறப்பு 'மார்பிங் ஸ்கின்' இறக்கை அமைப்பு, காற்றின் திசை மற்றும் வேகத்திற்கு ஏற்ப தன்னைத்தானே நிகழ்நேரத்தில் மாற்றியமைத்துக் கொள்ளும் திறன் கொண்டது.
இதன் மூலம், காற்றின் ஓட்டம் சீராக வைக்கப்பட்டு, விமானங்கள் அதிக கோணங்களில் சாய்ந்தாலும் நிலைதடுமாறாமல் பாதுகாப்பாகப் பறக்க முடியும். இந்தத் தொழில்நுட்பம் வணிக பயன்பாட்டு விமானங்களில் அறிமுகப்படுத்தப்படும்போது, பரபரப்பான மற்றும் குறுகிய ஓடுதளங்களிலும் விமானங்கள் பாதுகாப்பாகப் பறக்கவும் தரையிறங்கவும் இயலும்.
மேலும், இறக்கைகளின் இழுவை விசையைக் குறைத்து மேலெழும் ஆற்றலை அதிகரிப்பதால், விமானங்களின் எரிபொருள் பயன்பாடும் பெருமளவில் குறைந்து கார்பன் உமிழ்வு கட்டுப்படுத்தப்படும். இது சுற்றுச்சூழலுக்கு உகந்த ஒரு முக்கிய முன்னேற்றமாகும்.
சுமார் 20 ஆண்டுகால தொடர் ஆராய்ச்சியின் பலனாக உருவாக்கப்பட்டுள்ள இத்தொழில்நுட்பம், ஏற்கெனவே காற்றுச் சுரங்கப் பாதையில் சோதிக்கப்பட்டு காப்புரிமையும் பெறப்பட்டுள்ளது. தற்போதைய நிலையில், இந்த அமைப்பை நிஜ உலக இயக்கத்தில் நேரடியாகப் பயன்படுத்தும் அளவிற்குத் தயாராக உள்ளதாக ஆராய்ச்சியாளர்கள் தெரிவித்துள்ளனர்.
இந்த தொழில்நுட்பத்தின் ஒரு முக்கிய சிறப்பம்சமாக, புதிய விமானங்களில் மட்டுமின்றி, தற்போது பயன்பாட்டில் உள்ள விமானங்களின் இறக்கைகளிலும் இதனை எளிதாகப் பொருத்தி மேம்படுத்திக்கொள்ள முடியும் என்று ஆராய்ச்சியாளர்கள் குறிப்பிட்டுள்ளனர். இது விமானப் போக்குவரத்துத் துறையில் ஒரு குறிப்பிடத்தக்க மாற்றத்தை ஏற்படுத்தும் என எதிர்பார்க்கப்படுகிறது.
