பொதுத்துறை வங்கிகள் மற்றும் கிராம வங்கிகளில் காலியாக உள்ள 13,745 பணியிடங்களை நிரப்ப வங்கி பணியாளர் தேர்வு நிறுவனம் (ஐபிபிஎஸ்) அறிவிப்பு வெளியிட்டுள்ளது. இந்த வேலைவாய்ப்பில் தமிழ்நாட்டிற்கும் 400-க்கும் மேற்பட்ட இடங்கள் ஒதுக்கப்பட்டுள்ளன.
இந்த அறிவிப்பின்படி, 28 மாநிலங்களில் உள்ள மண்டல கிராம வங்கிகளில் பல்வேறு பதவிகளுக்கு விண்ணப்பிக்கலாம். இதில் அலுவலக உதவியாளர் பதவிக்கு 8,222 இடங்களும், அதிகாரி நிலை 1-க்கு 4,256 இடங்களும், பொது வங்கி அதிகாரி பதவிக்கு 666 இடங்களும், ஐடி அதிகாரிக்கு 182, சிஏ அதிகாரிக்கு 81, சட்ட பிரிவு அதிகாரிக்கு 46, கருவூல மேலாளருக்கு 18, மார்க்கெட்டிங் அதிகாரிக்கு 16, வேளாண் அதிகாரிக்கு 38 மற்றும் நிலை 3 அதிகாரிக்கு 220 என மொத்தம் 13,745 காலிப்பணியிடங்கள் நிரப்பப்பட உள்ளன.
**வயது வரம்பு மற்றும் தகுதிகள்:**
செப்டம்பர் 1, 2026 அன்றுள்ளபடி, அலுவலக உதவியாளர் பதவிக்கு 18 முதல் 28 வயது வரையிலும், நிலை 1 அதிகாரிக்கு 18 முதல் 30 வயது வரையிலும், நிலை 2 அதிகாரிக்கு 21 முதல் 32 வயது வரையிலும், நிலை 3 அதிகாரிக்கு 21 முதல் 40 வயது வரையிலும் விண்ணப்பிக்கலாம். எஸ்சி, எஸ்டி, ஒபிசி, மாற்றுத்திறனாளிகளுக்கு வயது வரம்பில் தளர்வுகள் உண்டு.
**கல்வித் தகுதி:**
அலுவலக உதவியாளர் பணிக்கு அங்கீகரிக்கப்பட்ட பல்கலைக்கழகத்தில் ஏதேனும் ஒரு துறையில் பட்டப்படிப்பு முடித்திருக்க வேண்டும். குறிப்பாக, தமிழ்நாடு கிராம வங்கிகளில் விண்ணப்பிப்பவர்களுக்கு தமிழ் மொழி அறிவு கட்டாயம் தேவை. பல்வேறு அதிகாரி பதவிகளுக்கு, அந்தந்த துறை சார்ந்த பட்டப்படிப்பில் 50% மதிப்பெண்களுடன் தேர்ச்சி பெற்றிருக்க வேண்டும். மேலும், அதிகாரி பதவிகளுக்கு குறைந்தபட்சம் ஒரு வருட அனுபவம் தேவைப்படும். மூத்த மேலாளர் பதவிக்கு 5 ஆண்டுகள் வரை அனுபவம் அவசியமாகும்.
**தேர்வு முறை:**
அலுவலக உதவியாளர் மற்றும் நிலை 1 அதிகாரி பதவிக்கு மட்டும், கணினி வழியில் கொள்குறி முறையில் முதல்நிலை மற்றும் முதன்மை என இரண்டு கட்டத் தேர்வுகள் நடத்தப்படும். இந்தத் தேர்வுகள் தமிழ், ஆங்கிலம் மற்றும் இந்தி மொழிகளில் நடைபெறும். மற்ற நிலை அதிகாரி பதவிகளுக்கு ஒரு கட்டத் தேர்வு மற்றும் நேர்காணல் நடைபெறும்.
**விண்ணப்பிக்கும் முறை:**
விருப்பமுள்ள பட்டதாரிகள், வங்கி பணியாளர் தேர்வு நிறுவனத்தின் அதிகாரப்பூர்வ இணையதளமான https://www.ibps.in/ மூலம் விண்ணப்பிக்கலாம். விண்ணப்பக் கட்டணமாக பொதுப் பிரிவினர் ரூ. 850 செலுத்த வேண்டும். எஸ்சி, எஸ்டி, மாற்றுத்திறனாளிகள் பிரிவினர் ரூ. 175 செலுத்தினால் போதுமானது.
**முக்கிய தேதிகள்:**
விண்ணப்பிக்க கடைசி நாள்: நவம்பர்/ டிசம்பர் 2026
முதல்நிலைத் தேர்வு: டிசம்பர் 2026/ ஜனவரி 2027
முதன்மைத் தேர்வு: டிசம்பர் 2026/ பிப்ரவரி 2027
நேர்காணல்: ஜனவரி/ பிப்ரவரி 2027
பணி நியமனம்: பிப்ரவரி/ மார்ச் 2027
தேர்வுக்கு உதவும் வகையில், நவம்பர் மாதத்தில் ஆன்லைன் வழியாக முந்தைய பயிற்சி அளிக்கப்படும் என்றும் வங்கி பணியாளர் தேர்வு நிறுவனம் தெரிவித்துள்ளது.
