உங்கள் வீட்டு மாடித் தோட்டத்தில் சுவையான மற்றும் ஆரோக்கியமான புடலங்காயை எளிதாக வளர்க்கலாம். தரமான விதைகள், சரியான மண் கலவை, போதுமான சூரிய ஒளி மற்றும் சீரான நீர்ப்பாசனம் ஆகியவற்றைக் கொண்டு, நச்சுத்தன்மையற்ற காய்கறிகளைப் பெற முடியும்.
புடலங்காய் ஒரு கொடி வகை தாவரம் என்பதால், படர்வதற்கு ஏதுவாக பந்தல் அல்லது குச்சிகளை அமைப்பதன் மூலம் குறுகிய காலத்தில் அதிக விளைச்சலைப் பெறலாம். இதற்காக, உயர் தரமான புடலங்காய் விதைகள், பழைய சாக்கு பைகள் அல்லது குறைந்தது அடி உயரமுள்ள மண் தொட்டிகள், ஆற்று மணல், தென்னை நார்க்கழிவு, செம்மண், மண்புழு உரம், மற்றும் பஞ்சகாவ்யா போன்ற பொருட்கள் தேவைப்படும். நீர் தெளிக்க ஸ்பிரேயர் அல்லது பூவாளி மற்றும் பந்தல் அமைக்க உபகரணங்களும் அவசியம்.
விதைகளை விதைப்பதற்கு முன், சாக்கு பை அல்லது மண் தொட்டியில் இரண்டு பங்கு தேங்காய் நார், ஒரு பங்கு நாட்டு மாட்டு சாணம், மற்றும் வீட்டு சமையலறைக் கழிவுகளைச் சேர்த்து நன்கு கலந்து, சுமார் 12 நாட்களுக்கு மட்க விட வேண்டும். நன்கு மட்கிய இந்தக் கலவையில் புடலங்காய் விதைகளை விதைக்கலாம்.
புடலங்காய் செடிகள் உயரமாக வளரும் என்பதால், குறைந்தது 3 அடி உயரமுள்ள சாக்கு பைகள் அல்லது மண் தொட்டிகளில் மண்ணை நிரப்பி விதைகளை நட வேண்டும். ஒரு தொட்டியில் அதிகபட்சமாக 4 முதல் 5 விதைகளை விதைத்து, சிறிய ஸ்பிரேயர் மூலம் நீர் தெளிக்க வேண்டும். தினமும் காலை மற்றும் மாலை வேளைகளில் சிறிதளவு நீர் தெளித்து பராமரிக்க வேண்டும்.
புடலங்காய் செடிகள் நன்றாக வளர்வதற்கு பந்தல் அமைப்பது மிகவும் முக்கியம். வீட்டு மாடியில் நான்கு மூலைகளில் உள்ள மண் தொட்டிகளில் மணல் மற்றும் மண்ணைக் கலந்து, மிதமான தடிமன் கொண்ட மூங்கில் கம்புகளை நட்டு, அவற்றை பிளாஸ்டிக் கயிறு அல்லது கம்பி கொண்டு இணைத்து பந்தல் போன்ற அமைப்பை உருவாக்க வேண்டும். வளர்ந்து வரும் இளம் புடலங்காய் பயிர்களைக் கொண்ட தொட்டிகளை, தரையிலிருந்து உயரமாக கற்கள் மீது வைத்து, மூங்கில் கம்புகளில் கொடிகள் படர விட வேண்டும்.
செடிகள் வளரும்போது பூச்சிகளின் தாக்குதல் ஏற்பட வாய்ப்புள்ளது. இதைச் சமாளிக்க, மாதத்திற்கு ஒரு முறை வேப்ப எண்ணெயை சிறிதளவு தெளிக்கலாம். மேலும், வேப்ப இலைகளை நன்கு காயவைத்து தூளாக்கி, செடியின் வேர்ப்பகுதிகளில் தூவினால், அது இயற்கை உரமாகவும் பூச்சித் தடுப்பாகவும் செயல்படும்.
செடியின் நுனிக்கிளைகளை அவ்வப்போது வெட்டி விடுவதால், கொடிகள் அதிகமாகப் பரவும். இரண்டு வாரங்களுக்கு ஒருமுறை மண்ணைக் கிளறி விடுவது, செடிக்கு ஊட்டம் அளித்து விரைவான வளர்ச்சிக்கு உதவும். மேலும், ஒரு லிட்டர் தண்ணீரில் 50 மி.லி பஞ்சகவ்யா கலந்து வேர்ப்பகுதிகளில் ஊற்றினால், பூக்கள் அதிகமாகப் பூக்கும்.
மாடியில் வளர்க்கப்படும் புடலங்காய் செடிகள் அதிகபட்சம் மூன்று மாதங்கள் வரை பலன் தரும். அதன் பிறகு, காய்ந்த இலைகள் மற்றும் கிளைகளை வெட்டி, தொட்டியின் வேர்ப்பகுதிகளில் உரமாகப் பயன்படுத்தலாம். காய்கள் சரியான பருவத்தில் அறுவடை செய்து பயன்படுத்த வேண்டும்.
