இந்திய கிரிக்கெட் அணியின் இளம் ஆல்-ரவுண்டர் நிதிஷ் குமார் ரெட்டி, வெஸ்ட் இண்டீஸ் அணிக்கு எதிரான ஒருநாள் தொடருக்கான இந்திய அணியில் சேர்க்கப்பட்டுள்ளார். இந்த வாய்ப்புக்காக, அவர் 2026 ஆசிய விளையாட்டுப் போட்டிகளுக்கான அணியில் இருந்து விடுவிக்கப்பட்டுள்ளார். சமீபத்தில் ஆப்கானிஸ்தானுக்கு எதிரான தொடரில் தனது சிறப்பான பந்துவீச்சால் பல விக்கெட்களை வீழ்த்தி அசத்தியிருந்தார் நிதிஷ் குமார்.
இதனையடுத்து, இந்திய அணியின் நட்சத்திர ஆல்-ரவுண்டர் ஹர்திக் பாண்டியா காயம் காரணமாக அணியில் இருந்து விலகி இருக்கும் நிலையில், அவருக்கு ஒரு சிறந்த மாற்றாக நிதிஷ் குமார் ரெட்டி விளங்குவார் என ரசிகர்கள் மத்தியில் ஒரு பேச்சு எழுந்தது. ஆனால், இந்த ஒப்பீட்டை முன்னாள் இந்திய வேகப்பந்து வீச்சாளர் மோஹித் சர்மா முற்றிலும் மறுத்துள்ளார்.
இது குறித்து பேசிய மோஹித் சர்மா, 'ஹர்திக் பாண்டியாவுடன் நிதிஷ் குமார் ரெட்டியை ஒப்பிடுவது முற்றிலும் தவறானது. தற்போதைய சூழலில், ஹர்திக் பாண்டியாவுக்கு நிதிஷ் குமார் ரெட்டி எந்த வகையிலும் இணையாக முடியாது. இப்படித் தேவையின்றி ஒப்பிடுவதால், நிதிஷ் ரெட்டி மீதான எதிர்பார்ப்பு அளவுக்கு அதிகமாக எகிறிவிடும்' என்று அவர் கூறினார்.
மேலும் அவர் தனது கருத்தை விரிவாகக் கூறுகையில், 'ஹர்திக் பாண்டியா களமிறங்கும் முதல் பந்திலேயே சிக்சர் அடித்து ஆட்டத்தின் போக்கை மாற்றும் அசாத்திய திறமை கொண்டவர். ஆனால் நிதிஷ் ரெட்டி அப்படிப்பட்ட ஆட்டக்காரர் அல்ல. அவர் களத்தில் சிறிது நேரம் நிலைத்து நின்று பந்துகளை எதிர்கொண்ட பிறகே தனது அதிரடியைத் தொடங்குவார். எனவே அவரிடம் இருந்து ஹர்திக் பாண்டியாவின் ஆட்டத்தை எதிர்பார்ப்பது நியாயமல்ல. அவரது தனிப்பட்ட திறமைக்கு ஏற்பவே அவரை நாம் பயன்படுத்த வேண்டும்' என வலியுறுத்தினார்.
நிதிஷ் குமாரின் பந்துவீச்சுத் திறனைப் பற்றியும் மோஹித் சர்மா கருத்து தெரிவித்தார். 'சர்வதேச அரங்கில் எதிரணியை மிரட்டும் அளவுக்கு தனது பந்துவீச்சுத் திறனையும் நிதிஷ் குமார் ரெட்டி இன்னும் மெருகேற்ற வேண்டியுள்ளது. எனவே அவர் மீது அதிக சுமையை ஏற்றாமல், நிதானமாக அவருக்கு வாய்ப்பளிக்க வேண்டும்' என்று மோஹித் சர்மா தெரிவித்தார்.
2027 ஒருநாள் போட்டி உலகக்கோப்பை தொடருக்கான அணியில் இடம் பெறும் வீரர்களை அடையாளம் காணும் பணியில் பிசிசிஐ தீவிரமாக இறங்கியுள்ளது. இந்த நிலையில், வேகப் பந்துவீச்சு ஆல் ரவுண்டர் ஹர்திக் பாண்டியாவுக்கு இணையான மாற்று வீரராக வேறு யாரும் இல்லாத காரணத்தினால், நிதிஷ் குமார் ரெட்டிக்கு இந்திய அணியில் வாய்ப்பு அளிக்கப்பட்டுள்ளது குறிப்பிடத்தக்கது.
இந்திய அணியில் இடமில்லை.. உத்தரபிரதேச தேர்தலில் நிற்கும் முகமது ஷமி? மத்திய அமைச்சருடன் சந்திப்பு என்ற செய்தியும் தற்போது பரவி வருகிறது. இது கிரிக்கெட் வட்டாரத்தில் பரபரப்பை ஏற்படுத்தியுள்ளது.
