மும்பையில் நடைபெற்ற ஐபிஎல் 2026 தொடரில் மும்பை இந்தியன்ஸ் அணியின் கேப்டனாக செயல்பட்ட ஹர்திக் பாண்டியா, மோசமான ஆட்டத்தை வெளிப்படுத்தியதால், அயர்லாந்து, இங்கிலாந்து டி20 தொடர்கள் மற்றும் ஆசிய விளையாட்டுப் போட்டிகளுக்கான இந்திய கிரிக்கெட் அணியில் சேர்க்கப்படவில்லை. இது ரசிகர்களிடையே பெரும் அதிர்ச்சியை ஏற்படுத்தியுள்ளது.
ஐபிஎல் 2026 தொடரில் ஹர்திக் பாண்டியா தலைமையில் மும்பை அணி 14 போட்டிகளில் வெறும் 4 வெற்றிகளுடன் 9-வது இடத்தைப் பிடித்து ஏமாற்றம் அளித்தது. ஒரு கேப்டனாக, பேட்ஸ்மேனாக மற்றும் பந்துவீச்சாளராகவும் ஹர்திக் பாண்டியா தனது சிறந்த ஆட்டத்தை வெளிப்படுத்தத் தவறியது அவரது நீக்கத்திற்கு ஒரு முக்கிய காரணமாகப் பார்க்கப்படுகிறது.
இது குறித்து தேர்வுக்குழுத் தலைவர் அஜித் அகர்கர் கூறுகையில், 'ஹர்திக் பாண்டியா இங்கிலாந்துக்கு எதிரான ஒருநாள் தொடருக்கான இந்திய அணியில் இடம்பெற்றுள்ளார். அடுத்த டி20 உலகக் கோப்பைக்கு இன்னும் 18 மாதங்கள் உள்ள நிலையில், டி20 அணியில் வீரர்களை சுழற்சி முறையில் பயன்படுத்தவும், சிலருக்கு ஓய்வளிக்கவும் முடிவு செய்துள்ளோம். ஹர்திக் பாண்டியாவின் பந்துவீச்சுத் திறன் தீவிரமாகக் கண்காணிக்கப்பட்டு, அதன் அடிப்படையில் அவரது உடற்தகுதியை மதிப்பிட்ட பிறகே அவர் டி20 போட்டிகளுக்குத் தேர்வு செய்யப்படுவார்' என்றார்.
இங்கிலாந்து மற்றும் அயர்லாந்து தொடருக்கான இந்திய டி20 அணியில் ஸ்ரேயாஸ் ஐயர் கேப்டனாகவும், திலக் வர்மா துணை கேப்டனாகவும் நியமிக்கப்பட்டுள்ளனர். 15 வயது வைபவ் சூர்யவன்ஷிக்கும் வாய்ப்பு வழங்கப்பட்டுள்ளது. ஆசிய விளையாட்டுப் போட்டிக்கான அணியிலும் ஸ்ரேயாஸ் ஐயர் கேப்டனாக செயல்படுவார்.
