முன்னாள் இந்திய கிரிக்கெட் வீரரும் மாநிலங்களவை உறுப்பினருமான ஹர்பஜன் சிங், சமூக வலைதளத்தில் போலி வீடியோவைப் பகிர்ந்ததன் மூலம் சர்ச்சையில் சிக்கியுள்ளார். இது தொடர்பாக பஞ்சாப் காவல்துறை அவருக்குக் கடும் கண்டனம் தெரிவித்துள்ளது.
ஹர்பஜன் சிங் தனது எக்ஸ் (முன்னர் ட்விட்டர்) கணக்கில், அசைவற்று நிற்கும் இரண்டு இளைஞர்களின் காணொளியைப் பகிர்ந்து, பஞ்சாபில் அதிகரித்து வரும் போதைப்பொருள் அச்சுறுத்தல் குறித்து ஆழ்ந்த கவலையை வெளிப்படுத்தினார். அம்மாநில இளைஞர்களின் அவல நிலையையும் அவர் வருத்தத்துடன் குறிப்பிட்டார். அரசாங்கங்கள் பஞ்சாபையும் அதன் இளைய தலைமுறையையும் பாழாக்கிவிட்டதாகவும், மாநில இளைஞர்களைப் போதைப்பழக்கத்திலிருந்து 'காப்பாற்ற' அவசர நடவடிக்கைகள் தேவை என்றும் அவர் அழைப்பு விடுத்தார்.
முன்னதாக, ஹர்பஜன் சிங் ஆம் ஆத்மி கட்சியில் இருந்து மாநிலங்களவை உறுப்பினராக தேர்ந்தெடுக்கப்பட்டார். அரவிந்த் கெஜ்ரிவால் அவரை மாநிலங்களவைக்கு அனுப்பியிருந்தார். ஆனால், சமீபத்தில் கட்சி மாறிய அவர், பாஜகவில் இணைந்தார். இந்தச் சூழலில், கட்சி மாறிய உடனேயே அவர் இந்த 'ஜாம்பி' போதைப்பொருள் விவகாரத்தை வைத்து ஆம் ஆத்மி கட்சியை விமர்சித்தார்.
ஹர்பஜன் சிங் வீடியோவைப் பகிர்ந்த சிறிது நேரத்திலேயே, பஞ்சாப் அமைச்சரும் ஆம் ஆத்மி கட்சியின் மூத்த தலைவருமான டாக்டர் பல்ஜித் கவுர் இதற்கு கடும் எதிர்ப்பு தெரிவித்தார். அந்த வீடியோ பஞ்சாபில் எடுக்கப்பட்டது அல்ல என்றும், ராஜஸ்தானின் ஸ்ரீகங்காநகரில் நடந்த சம்பவத்தை பஞ்சாப் சம்பவம் போல் ஹர்பஜன் சிங் சித்தரித்ததாகவும் அவர் குற்றம் சாட்டினார்.
இந்நிலையில், அந்த வீடியோ பஞ்சாபில் எடுக்கப்பட்டது அல்ல என்றும், அது தவறான தலைப்புடன் பரப்பப்பட்டிருந்தது என்றும் பஞ்சாப் காவல்துறை உறுதிப்படுத்தியுள்ளது. எக்ஸ் தளத்தில் இந்த வீடியோ வைரலானதைத் தொடர்ந்து, பஞ்சாப் காவல்துறையின் கவனத்திற்கு இது கொண்டுவரப்பட்டது. அவர்கள் அதன் மூலத்தை ஆராய்ந்து, அந்தக் காணொளி உண்மையில் ராஜஸ்தானின் ஸ்ரீ கங்கானகரில் படமாக்கப்பட்டது என்றும், அதற்கும் பஞ்சாபிற்கும் எந்தவிதமான தொடர்பும் இல்லை என்றும் தெரிவித்தனர்.
தங்களது அதிகாரப்பூர்வ எக்ஸ் பக்கத்தில், பஞ்சாப் காவல்துறை, தவறான தகவலைப் பரப்பும் காணொளியைப் பகிர்ந்ததற்காக ஹர்பஜன் சிங்கை கண்டித்தது. ஒரு சம்பவத்தில் பஞ்சாபி ஒலி இருப்பதால் மட்டும் அது பஞ்சாப் சம்பவம் ஆகிவிடாது என்றும் காவல்துறை சுட்டிக்காட்டியது. மேலும், சமூக ஊடகங்களில் தவறான தகவலைப் பதிவிடுவதற்கு அல்லது பகிர்வதற்கு முன்பு, பயனர்கள் உண்மைகளையும் இடத்தையும் சரிபார்க்க வேண்டும் என்றும் அது வலியுறுத்தியுள்ளது. இந்தச் சம்பவம் சமூக வலைதளங்களில் தகவல்களைப் பகிரும்போது கவனமாக இருக்க வேண்டியதன் அவசியத்தை உணர்த்தியுள்ளது.
