பருவமழை காலம் என்பதால், எச்1என்1 இன்ஃப்ளூயன்சா வைரஸ் பாதிப்பு இந்தியாவில் கணிசமாக உயர்ந்துள்ளது. குறிப்பாக டெல்லியில் 1770 பேருக்கு இந்த ஸ்வைன் ஃப்ளூ தொற்று உறுதி செய்யப்பட்டுள்ளது. மகாராஷ்டிரா, கர்நாடகா, மேற்குவங்க மாநிலங்களிலும் பாதிப்பு அதிகரித்து வருவதாக இந்திய மருத்துவக் கழகம் (ஐஎம்ஏ) தெரிவித்துள்ளது.
இந்த சூழலில், பொது மக்கள் தாங்களாகவே ஆன்டிவைரல் மற்றும் ஆன்டிபயாடிக் மருந்துகளை உட்கொள்ள வேண்டாம் என ஐஎம்ஏ முக்கிய அறிவுரை வழங்கியுள்ளது. தீவிர அறிகுறிகள் தென்பட்டால், தாமதிக்காமல் உடனடியாக மருத்துவமனைக்குச் செல்ல வேண்டும் என்றும் வலியுறுத்தியுள்ளது. அதேசமயம், தற்போது பரவும் தொற்று வழக்கமான வைரஸ் தான் என்றும், இது மரபணு உருமாற்றம் கொண்டதல்ல என்பதால் மக்கள் பதற்றமடைய வேண்டாம் என்றும் ஐஎம்ஏ தெரிவித்துள்ளது.
இந்திய மருத்துவ ஆராய்ச்சிக் கவுன்சில் (ஐசிஎம்ஆர்) வெளியிட்டுள்ள அறிக்கையின்படி, தற்போது பரவிவரும் இன்ஃப்ளூயன்சா வைரஸ் எச்1என்1 வகையைச் சேர்ந்ததுதான் என்றும், அதில் புதிதாக எந்த மரபணு மாற்றமும் ஏற்படவில்லை என்றும் உறுதி செய்யப்பட்டுள்ளது. இந்த தகவலையும் ஐஎம்ஏ தனது அறிக்கையில் சுட்டிக்காட்டியுள்ளது.
பொதுமக்கள் தாங்களாகவே அசித்ரோமைசின், அமாக்சிலின் – க்ளாவுலனேட், செஃபிக்ஸைம் அல்லது பிற ஆன்டிபயாடிக் மருந்துகளை உட்கொள்ள வேண்டாம் என ஐஎம்ஏ கடுமையாக வலியுறுத்தியுள்ளது. அவ்வாறு மருந்துகளை வாங்கி உட்கொண்டால், அவை உடலைப் பாதுகாக்கும் மைக்ரோபயோம்களை அழித்து, நுண்ணுயிர் எதிர்ப்பி எதிர்ப்பு (Antimicrobial resistance – AMR) நிலையை உருவாக்கிவிடும். மேலும், ஆன்டிவைரல் மருந்துகளையும் தாமாக வாங்கி உட்கொள்ளக் கூடாது.
நோயின் தீவிரத்தை மருத்துவர் பரிசோதித்து வழங்கும் மருந்துகளை மட்டுமே உட்கொள்ள வேண்டும். எச்1என்1 பாதிப்பின் அறிகுறிகளாக காய்ச்சல், சளி, இருமல், தும்மல், தலைவலி, தொண்டை வலி, வாந்தி, வயிற்றுப்போக்கு போன்ற லேசான அறிகுறிகள் ஏற்படலாம். மூச்சு விடுவதில் சிரமம், நெஞ்சு வலி, மயக்கம், சளியில் ரத்தம், சர்க்கரை நோய் அதிகமாகுதல், விரல்கள் நீல நிறமாக மாறுதல் போன்ற தீவிர அறிகுறிகளும் தென்படலாம்.
எச்1என்1 பாதிப்பு ஏற்படாமல் தடுக்க, காய்ச்சல் அறிகுறி உள்ளவர்கள் மற்றும் இருமல், தும்மல் இருப்பவர்களிடம் இருந்து சுமார் 1 மீட்டர் இடைவெளிவிட்டு விலகி இருப்பது பாதுகாப்பானது. வெதுவெதுப்பான நீரில் உப்பு கலந்து வாய் கொப்பளித்தல், வெதுவெதுப்பான நீரை குடித்தல் போன்றவற்றை பின்பற்றலாம்.
பொதுமக்கள் அதிகம் கூடும் இடங்களான பேருந்து, ரயில் நிலையங்கள், திரையரங்குகள், வணிக வளாகங்கள் போன்ற இடங்களுக்கு செல்பவர்கள் தற்காப்பு நடவடிக்கையாக முகக் கவசங்களை (மாஸ்க்) அணிந்து செல்லலாம். கைகளை சுத்தமாக கழுவுவதன் மூலமும் எச்1என்1 பாதிப்பை பெருமளவில் தடுக்கலாம். பொது இடங்களுக்குச் சென்று திரும்பும்போது 20 வினாடிகள் சோப்பு போட்டு கைகளை நன்றாக கழுவுதல் அல்லது ஆல்கஹாலை அடிப்படையாகக் கொண்ட கிருமி நாசினிகளைப் பயன்படுத்துதல் அவசியம்.
இந்த பொது மக்களுக்கான வழிகாட்டுதல்களை ஐஎம்ஏ தேசியத் தலைவர் அனில்குமார் நாயக் தலைமையிலான குழு வெளியிட்டுள்ளது. இதன் மூலம் எச்1என்1 பாதிப்பிலிருந்து பொதுமக்களைப் பாதுகாக்க முடியும் என நம்பப்படுகிறது.
