காஷ்மீரின் குல்மார்க் பகுதியில் அமைந்துள்ள, உலகிலேயே இரண்டாவது நீளமான மற்றும் உயரமான 'கோண்டோலா' ரோப் கார் சேவையில் நேற்று திடீரென தொழில்நுட்ப கோளாறு ஏற்பட்டது. இந்த ரோப் கார் சேவையின் முதல் கட்டம் 8,694 அடி உயரமுள்ள காங்தோரி பள்ளத்தாக்கு பகுதியையும், இரண்டாம் கட்டம் 13,058 அடி உயரத்தில் உள்ள காங்தோரி மலைப் பகுதியையும் இணைக்கிறது.
நேற்று சுமார் 300 சுற்றுலாப் பயணிகள் இந்த ரோப் காரில் பயணித்துக் கொண்டிருந்தபோது, எதிர்பாராதவிதமாக தொழில்நுட்ப பழுது ஏற்பட்டது. இதனால் ரோப் கார் அந்தரத்திலேயே நின்றது. இதில் பயணம் செய்த குழந்தைகள் மற்றும் பெண்கள் மத்தியில் பெரும் பீதி ஏற்பட்டது. பழுதை உடனடியாக சரிசெய்ய முடியாத நிலை ஏற்பட்டது.
இதையடுத்து, ராணுவத்தினர், காவல்துறையினர் மற்றும் உள்ளூர் நிர்வாகத்தினர் அடங்கிய மீட்புக் குழுவினர் உடனடியாக சம்பவ இடத்திற்கு விரைந்தனர். அந்தரத்தில் தொங்கிக் கொண்டிருந்த சுற்றுலாப் பயணிகளை பத்திரமாக மீட்கும் பணியில் அவர்கள் ஈடுபட்டனர். சுமார் 8 மணி நேர போராட்டத்திற்குப் பிறகு, அனைத்து 300 சுற்றுலாப் பயணிகளும் பாதுகாப்பாக மீட்கப்பட்டனர்.
இந்தச் சம்பவம் சுற்றுலாப் பயணிகளிடையே சிறிது அச்சத்தை ஏற்படுத்தினாலும், மீட்புக் குழுவினரின் விரைவான மற்றும் திறமையான செயல்பாடு பெரும் விபத்தைத் தடுத்தது. ரோப் கார் சேவையில் இதுபோன்ற தொழில்நுட்பக் கோளாறுகள் ஏற்படாமல் தடுக்க உரிய நடவடிக்கைகள் எடுக்கப்பட வேண்டும் என சுற்றுலாப் பயணிகள் கோரிக்கை விடுத்துள்ளனர்.
