தொழில்நுட்ப உலகில் கூகுள் நிறுவனம் ஒரு புதிய புரட்சியை ஏற்படுத்தியுள்ளது. 'கூகுள் ஜெமினி' செயற்கை நுண்ணறிவு (AI) தொழில்நுட்பத்தில், 'கால் பார் மீ' (Call for me) என்ற புதிய வசதி அறிமுகப்படுத்தப்பட்டுள்ளது. இதன் மூலம், இனி பயனர்கள் தங்களுக்கு பதிலாக கூகுளின் ஜெமினி AI-யை கொண்டே தொலைபேசி அழைப்புகளை மேற்கொள்ள முடியும்.
தகவல் பரிமாற்றத்திற்காக வாட்ஸ்அப், இன்ஸ்டாகிராம் போன்ற சமூக வலைதளங்களை நாம் பரவலாகப் பயன்படுத்தினாலும், வீட்டு உபயோகப் பொருட்களுக்கான சர்வீஸ், உணவகங்களில் மேஜை முன்பதிவு, புதிய பொருட்கள் வாங்குவதற்கான விலை விவரங்கள் போன்ற தேவைகளுக்கு நாம் நேரடியாக தொலைபேசியில் தொடர்பு கொள்ள வேண்டியுள்ளது. இத்தகைய சூழல்களில், பயனர்களின் நேரத்தை மிச்சப்படுத்தவும், சிரமத்தைக் குறைக்கவும் இந்த புதிய 'கால் பார் மீ' வசதி உருவாக்கப்பட்டுள்ளது.
இந்த வசதியைப் பயன்படுத்த, கூகுளின் ஜெமினி செயலியில் '@கால் பார் மீ' என டைப் செய்து, அழைக்க வேண்டிய மொபைல் எண் மற்றும் தேவையான பிற தகவல்களைப் பதிவிட வேண்டும். உதாரணமாக, ஒரு குறிப்பிட்ட உணவகத்தில் நாளை இரவு 7 மணிக்கு இரண்டு நபர்களுக்கு மேஜை முன்பதிவு செய்ய வேண்டும் என ஜெமினியிடம் தெரிவிக்கலாம்.
தொலைபேசியில் அழைப்பை மேற்கொள்வதற்கு முன்பாக, எந்த எண்ணைத் தொடர்பு கொள்ளப் போகிறது, என்ன தகவல்களைப் பேச உள்ளது என்பது போன்ற விவரங்களின் சுருக்கத்தை ஜெமினி பயனருக்கு வழங்கும். பயனர்கள் அந்த விவரங்களைச் சரிபார்த்து, அழைப்பை மேற்கொள்ள அனுமதி அளித்தால் போதுமானது.
அனுமதி கிடைத்தவுடன், ஜெமினி அந்த நிறுவனத்தைத் தொடர்பு கொண்டு, தன்னை அறிமுகப்படுத்திக் கொண்டு, பயனருக்காகப் பேசி தேவையான தகவல்களைப் பெற்றுத் தரும். பயனர்கள் எந்த நேரத்திலும் இந்த அழைப்பை ரத்து செய்யவும், அல்லது தாங்களே நேரடியாகப் பேசும் வகையில் அழைப்பை தங்கள் கட்டுப்பாட்டுக்குள் எடுத்துக் கொள்ளவும் முடியும்.
தற்போது இந்த அதிநவீன 'கால் பார் மீ' வசதி, சோதனை அடிப்படையில் அமெரிக்காவில் மட்டுமே செயல்பாட்டுக்கு வந்துள்ளது. விரைவில் உலகளவில் விரிவுபடுத்தப்படும் என எதிர்பார்க்கப்படுகிறது. இது கூகுள் ஜெமினியின் திறன்களை மேலும் மேம்படுத்தும் ஒரு முக்கிய படியாகக் கருதப்படுகிறது.
