உலகளாவிய பதற்றமான சூழல் காரணமாக கடந்த வாரத்தின் தொடக்கத்தில் தங்கத்தின் விலை உச்சத்தை தொட்டது. ஹோர்முஸ் நீரிணையில் அமெரிக்கா மற்றும் ஈரான் இடையே போர் பதற்றம் அதிகரித்ததால் கச்சா எண்ணெய் விலை உயர்ந்தது. இது உலகளாவிய பணவீக்கம் குறித்த அச்சத்தையும் எழுப்பியது.
மேலும், அமெரிக்க வேலை வாய்ப்புகள் குறித்த தரவுகள் வெளியான நிலையில், அமெரிக்க மத்திய வங்கி செப்டம்பர் மாதத்தில் வட்டி விகிதங்களை உயர்த்தக்கூடும் என்ற எதிர்பார்ப்பு சந்தையில் நிலவியது. இதனால், தங்கத்தில் முதலீடு செய்திருந்த முதலீட்டாளர்கள் பணத்தை எடுத்து டாலரில் முதலீடு செய்யத் தொடங்கினர். இதன் விளைவாக, ஆகஸ்ட் 29, 31 மற்றும் செப்டம்பர் 2 ஆகிய தேதிகளில் தங்கத்தின் விலை கணிசமாக குறைந்தது.
ஆனால், அமெரிக்க ஃபெடரல் ரிசர்வ் வங்கி வட்டி விகிதத்தில் எந்த மாற்றத்தையும் மேற்கொள்ளாமல் அப்படியே தொடர்வதற்கான வாய்ப்புகள் இருப்பதாக எதிர்பார்க்கப்படுகிறது. இதனால், முதலீட்டாளர்களின் கவனம் மீண்டும் தங்கம் பக்கம் திரும்பியுள்ளது. இதன் விளைவாக, கடந்த செப்டம்பர் 3ஆம் தேதி தங்கம் விலை 2 சதவீதம் உயர்ந்தது.
நேற்று (செப்டம்பர் 6) ஞாயிற்றுக்கிழமை என்பதால் தங்கம் மற்றும் வெள்ளியின் விலையில் எந்த மாற்றமும் இன்றி விற்பனையானது. தங்க நகைப் பிரியர்களுக்கு மகிழ்ச்சி அளிக்கும் வகையில், இன்று (செப்டம்பர் 7) தங்கத்தின் விலை மளமளவென சரிந்துள்ளது.
22 காரட் ஆபரணத் தங்கத்தின் ஒரு சவரன் விலை ரூ.480 குறைந்து, ரூ.1,13,040-க்கு விற்பனையாகிறது. ஒரு கிராம் தங்கம் ரூ.60 குறைந்து ரூ.14,130-க்கு விற்பனையாகிறது.
வெள்ளியைப் பொறுத்தவரை, அதன் விலையில் எந்த மாற்றமும் இல்லை. ஒரு கிராம் வெள்ளி ரூ.255-க்கும், ஒரு கிலோ பார் வெள்ளி ரூ.2,55,000-க்கும் விற்பனையாகிறது. தங்கத்தின் விலை வீழ்ச்சி நடுத்தர மக்களை மகிழ்ச்சியில் ஆழ்த்தியுள்ளது.
