தங்கம் வாங்க திட்டமிட்டிருப்பவர்களுக்கு ஒரு மகிழ்ச்சியான செய்தி வெளியாகி உள்ளது. ஆபரணத் தங்கத்தின் விலையில் இன்று ஒரு கிராம் சுமார் ரூ.55 வரை சரிவு ஏற்பட்டுள்ளது. இதனால், ஒரு சவரன் தங்கத்தின் விலையும் கணிசமாக குறைந்துள்ளது.
கடந்த மாதத்தில் தங்கத்தின் விலையில் திடீரென ஏற்றம் காணப்பட்டது. அதன் பிறகு, ஒரு வாரத்திற்கும் மேலாக தங்கத்தின் விலை ஒரு நாள் உயர்ந்து, அடுத்த நாள் இறங்குவது போன்ற நிலையற்ற தன்மையிலேயே காணப்பட்டது. இதனால், தங்கத்தை வாங்க கையில் பணம் வைத்திருந்தவர்கள், சரியான விலை எப்போது வரும் என குழப்பத்தில் இருந்தனர்.
இந்தியாவில் மட்டும் தான் தங்கத்தின் விலை இப்படி ஆட்டம் காண்கிறதா? என்ற கேள்வி எழலாம். ஆனால், சர்வதேச அளவில் தினந்தோறும் ஏற்படும் விலை மாற்றங்களே இந்தியாவிலும் தங்கத்தின் விலை ஏற்ற இறக்கங்களுக்கு முக்கிய காரணமாக பார்க்கப்படுகிறது. தங்கத்தின் விலை எப்போது குறையும் என்று கேட்டால், அமெரிக்க ஃபெடரல் வங்கி ஒன்று அல்லது இரண்டு முறை வட்டி விகிதத்தை உயர்த்தினால் மட்டுமே அது சாத்தியமாகும் என பொருளாதார நிபுணர்கள் தெரிவிக்கின்றனர்.
நேற்று (செப்டம்பர் 16) நிலவரப்படி, 22 காரட் ஒரு கிராம் ஆபரணத் தங்கத்தின் விலை ரூ.25 உயர்ந்து ரூ.14,065 ஆகவும், ஒரு சவரன் தங்கம் ரூ.200 உயர்ந்து ரூ.1,12,520 ஆகவும் விற்பனையானது. அதே சமயம், வெள்ளி விலையில் எந்த மாற்றமும் இன்றி ஒரு கிராம் ரூ.250-க்கு விற்பனையானது.
ஆனால், இன்றைய நிலவரப்படி (செப்டம்பர் 17), தங்கத்தின் விலையில் மிகப்பெரிய சரிவு ஏற்பட்டுள்ளது. 22 காரட் ஒரு கிராம் ஆபரணத் தங்கத்தின் விலை ரூ.55 குறைந்து ரூ.14,010-க்கு விற்பனையாகிறது. ஒரு சவரன் தங்கத்தின் விலையும் ரூ.440 குறைந்து, ரூ.1,12,080-க்கு விற்பனையாகிறது.
வெள்ளியின் விலையில் இன்று எந்த மாற்றமும் இல்லை. ஒரு கிராம் வெள்ளி ரூ.250-க்கும், ஒரு கிலோ பார் வெள்ளி ரூ.2,50,000-க்கும் விற்பனையாகிறது. தங்கத்தின் விலையில் ஏற்பட்டுள்ள இந்த திடீர் சரிவு, நுகர்வோருக்கு ஒரு நல்ல செய்தியாக அமைந்துள்ளது.
