தமிழக அரசு, ஜெம் வீரமணி மீதான பாலியல் வன்கொடுமை வழக்கை விசாரிக்க ஒரு சிறப்பு புலனாய்வு குழுவை (SIT) அமைத்துள்ளது. இந்த வழக்கு இனி சிறப்பு புலனாய்வு குழுவின் கீழ் விசாரிக்கப்படும்.
முன்னதாக, இந்த வழக்கில் கைது செய்யப்பட்ட ஜெம் வீரமணி, தற்போது புழல் சிறையில் அடைக்கப்பட்டுள்ளார். மேலும், அவருக்கு உடந்தையாக இருந்ததாக சாந்தி என்ற பெண் மற்றும் அவரது கணவர் மகேந்திர சிம்கன் ஆகியோரும் கைது செய்யப்பட்டுள்ளனர். ஜெம் வீரமணியின் உதவியாளர் கணேசன் உட்பட இதுவரை மொத்தம் 4 பேர் இந்த வழக்கில் கைது செய்யப்பட்டுள்ளனர்.
இந்த விவகாரத்தில், புகார் அளிக்கப்பட்டபோது முறையாக விசாரணை நடத்தாத காவல் அதிகாரிகள் மீதும் தமிழக அரசு நடவடிக்கை எடுத்துள்ளது. குறிப்பாக, இந்த புகார் தொடர்பாக விசாரணை நடத்தி, எந்த தகவலையும் கண்டறிய முடியவில்லை என நீதிமன்றத்தில் இறுதி அறிக்கை தாக்கல் செய்த விசாரணை அதிகாரிகளான விபசார தடுப்புப்பிரிவு உதவி ஆய்வாளர் யாஸ்மின், ஆய்வாளர்கள் மகேஷ்குமார், ராஜலட்சுமி, சென்னை மத்திய குற்றப்பிரிவு கூடுதல் கமிஷனர் கண்ணன், அருண் ஆகியோர் மீது நடவடிக்கை எடுக்கப்பட்டுள்ளது.
இந்த நடவடிக்கையின் ஒரு பகுதியாக, அருண் மற்றும் யாஸ்மின் ஆகியோர் கட்டாய காத்திருப்போர் பட்டியலுக்கு மாற்றப்பட்டுள்ளனர். இந்த வழக்கில் மேலும் பல முக்கிய நபர்கள் சிக்கும் வாய்ப்புகள் இருப்பதாக எதிர்பார்க்கப்படுகிறது.
இந்நிலையில், ஜெம் வீரமணி மீதான பாலியல் குற்ற வழக்கை விசாரிக்க 4 பேர் கொண்ட சிறப்பு புலனாய்வு குழுவை (SIT) அமைத்து டிஜிபி மகேஷ்குமார் அகர்வால் உத்தரவிட்டுள்ளார். இந்த குழுவின் விசாரணை மூலம் வழக்கில் மேலும் பல உண்மைகள் வெளிவரும் என எதிர்பார்க்கப்படுகிறது.
