இளம் சிறுமிகளை பாலியல் துன்புறுத்தலுக்கு ஆளாக்கியதாக ஜெம் கிரானைட் வீரமணி மீது பதிவு செய்யப்பட்ட போக்சோ வழக்கில், விசாரணையை விரைந்து முடித்து குற்றப்பத்திரிக்கை தாக்கல் செய்து தண்டனை பெற்றுத்தர தமிழ்நாடு அரசு நடவடிக்கை எடுக்க வேண்டும் என மதிமுக பொதுச்செயலாளர் வைகோ வலியுறுத்தியுள்ளார்.
இது தொடர்பாக வைகோ வெளியிட்டுள்ள அறிக்கையில், 'குன்றின் அனையாரும் குன்றுவர் குன்றுவ குன்றி அனைய செயின்' என்ற திருக்குறளை மேற்கோள் காட்டி, தொழிலதிபர் வீரமணியால் தமிழ்நாட்டிற்கு ஏற்பட்ட இழிவையும் தலைகுனிவையும் குறிப்பிட்டுள்ளார். முதலமைச்சர் விஜய் அவர்களின் நேரடி கண்காணிப்பின் கீழ் இந்த வழக்கு முறையாக கையாளப்பட்டு வருவது வரவேற்கத்தக்கது என்றும் அவர் தெரிவித்துள்ளார்.
பல ஆண்டுகளாக குழந்தைகளை இந்த கொடூரத்திற்கு இரையாக்கிய தொழிலதிபர் வீரமணி மட்டுமின்றி, இதற்கு துணைபோனவர்கள் யாராக இருந்தாலும் அவர்களை கண்டறிந்து கைது செய்து குற்றக்கூண்டில் நிறுத்தி தண்டிக்க வேண்டும் என்றும் வைகோ கோரிக்கை விடுத்துள்ளார்.
கடந்த ஆட்சிக் காலத்தில், தொழிலதிபர் வீரமணியின் வழக்கை ஆழக்குழி தோண்டிப் புதைக்க முயன்ற காவல்துறை அதிகாரிகள், அரச பீடத்திலிருந்து உதவிய பெரிய மனிதர்கள், இடைத்தரகர்கள் எவரும் இந்த வழக்கில் தப்பித்து விடக்கூடாது என்று முதலமைச்சர் விஜய் உத்தரவிட்டிருப்பதாக வெளியான செய்தி, நீதி நிலைநாட்டப்படும் என்ற நம்பிக்கையை அளிக்கிறது என்றும் அவர் குறிப்பிட்டுள்ளார்.
இந்த வழக்கில் எவ்வித அழுத்தங்களுக்கும் விஜய் அரசு இடம் தராது என்பதும் உறுதிப்படுத்தப்பட்டுள்ளது. முதலமைச்சரின் வழிகாட்டுதலில் வழக்கின் விசாரணை சரியான திசையில் நடத்தப்பட்டு வரும்போது, விசாரணை ஆணையம் மற்றும் சிபிஐ விசாரணை ஆகியவை தேவையற்றவை என்றும் வைகோ கூறியுள்ளார்.
எனவே, அத்தகைய கோரிக்கைகளை நிராகரித்து, ஜெம் கிரானைட் வீரமணி வழக்கில் விரைந்து விசாரணையை முடித்து, நீதிமன்றத்தில் குற்றப்பத்திரிக்கையை தாக்கல் செய்து தண்டனை பெற்றுத்தர தமிழ்நாடு அரசு உடனடியாக நடவடிக்கை மேற்கொள்ள வேண்டும் என வலியுறுத்துவதாக தனது அறிக்கையில் வைகோ தெரிவித்துள்ளார்.
