பாலில் இருந்து தயாரிக்கப்படாத செயற்கை பனீர் விற்பனைக்கு தடை விதிக்க இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) அதிரடியாக முடிவு செய்துள்ளது. இது நுகர்வோரை ஏமாற்றும் முறைகேடான நடைமுறையைத் தடுக்கும் என ஆணையம் தெரிவித்துள்ளது.
அசல் பனீருக்குப் பதிலாக, செயற்கைப் பொருட்களைக் கொண்டு தயாரிக்கப்படும் 'அனலாக்' பனீர் சந்தையில் விற்கப்படுவதைத் தடுப்பதே இந்தத் தடையின் முக்கிய நோக்கமாகும். இது குறித்து இந்திய உணவுப் பாதுகாப்பு மற்றும் தர நிர்ணய ஆணையம், 2011 ஆம் ஆண்டு உணவுப் பாதுகாப்பு மற்றும் தரநிலைகள் (விற்பனைத் தடை மற்றும் கட்டுப்பாடுகள்) விதிகளில் திருத்தம் செய்வதற்கான வரைவு அறிவிக்கையை வெளியிட்டுள்ளது.
இந்த வரைவு விதிகளின்படி, பாலில் இருந்து தயாரிக்கப்படாத அல்லது தாவர எண்ணெய், ஸ்டார்ச், தாவர புரதங்கள் மற்றும் பிற ரசாயனக் கலவைகளைக் கொண்டு தயாரிக்கப்படும் 'அனலாக்' தயாரிப்புகளுக்கு 'பனீர்' என்ற பெயரைப் பயன்படுத்த முற்றிலுமாகத் தடை விதிக்கப்படுகிறது. ஏற்கனவே உரிமம் பெற்ற அல்லது பதிவு செய்யப்பட்ட நிறுவனங்கள், தங்களது பொருட்களின் பெயர், லேபிள் மற்றும் சந்தைப்படுத்துதலில் இருந்து 'பனீர்' என்ற சொல்லை உடனடியாக நீக்க வேண்டும் என்றும் அறிவுறுத்தப்பட்டுள்ளது.
இந்த வரைவுத் திருத்தங்கள் குறித்து பொதுமக்கள், வர்த்தக அமைப்புகள் மற்றும் பிற பங்குதாரர்கள் தங்களது கருத்துக்கள், ஆட்சேபனைகள் அல்லது பரிந்துரைகளை அடுத்த 60 நாட்களுக்குள் மின்னஞ்சல் அல்லது தபால் மூலமாகத் தெரிவிக்கலாம் என ஆணையம் தெரிவித்துள்ளது. பெறப்படும் பரிந்துரைகளைப் பரிசீலித்த பின்னரே, இறுதி விதிமுறைகள் நாடு முழுவதும் நடைமுறைக்கு வரும்.
ஏற்கனவே மகாராஷ்டிரா, கர்நாடகா, மத்தியப் பிரதேசம், தெலங்கானா மற்றும் இமாச்சலப் பிரதேசம் உள்ளிட்ட பல மாநிலங்கள் இது போன்ற செயற்கை பனீர் தயாரிப்புக்குத் தடை விதித்துள்ளன. இந்த மாநிலங்களில் அனலாக் பனீர் விற்பனைக்கு அனுமதி இல்லை.
மேலும், பிரபல உணவு விநியோகத் தளமான ஜொமேட்டோவும் தனது தளத்தில் செயற்கைப் பால் பொருட்களைப் பயன்படுத்தி சமைக்கப்படும் உணவுகளைத் தடை செய்துள்ளது. இந்த விதிமுறைகளை மீறும் உணவகங்கள் மீது கடுமையான நடவடிக்கை எடுக்கப்படும் என்றும், அத்தகைய உணவகங்கள் தளத்திலிருந்து நீக்கப்படும் என்றும் ஜொமேட்டோ அறிவித்துள்ளது குறிப்பிடத்தக்கது.
