துபாயில் நடைபெற்ற மகளிர் ஆசியக் கோப்பை கிரிக்கெட் போட்டியில், இந்திய தொடக்க ஆட்டக்காரர் ஷஃபாலி வர்மாவை வீழ்த்திய பாகிஸ்தான் கேப்டன் ஃபாத்திமா சனா, அவரை ஆக்ரோஷமான முறையில் வழியனுப்பி வைத்த சம்பவம் கிரிக்கெட் ரசிகர்களிடையே பெரும் விவாதத்தை ஏற்படுத்தியுள்ளது. இந்த போட்டியின்போது, முதலில் பேட்டிங் செய்த பாகிஸ்தான் மகளிர் அணி, இந்திய அணியின் சிறப்பான பந்துவீச்சின் காரணமாக வெறும் 55 ரன்களுக்கு ஆட்டமிழந்தது. 56 ரன்கள் என்ற எளிய இலக்கை நோக்கி பதிலடி கொடுத்த இந்திய அணிக்கு, ஷஃபாலி வர்மா மிக அதிரடியான தொடக்கத்தை அளித்தார். அவர் எதிர்கொண்ட முதல் பந்திலேயே சிக்ஸர் அடித்து அசத்தியதோடு, இந்திய அணியை 8 பந்துகளில் 14 ரன்களுக்கு முன்னேற்றினார். எனினும், பாகிஸ்தானின் முக்கிய ஆல்-ரவுண்டரான ஃபாத்திமா சனா வீசிய ஓவரில், பந்தை அடிக்க முயன்ற ஷஃபாலி வர்மா, பந்து பேட்டில் எட்ஜ் ஆகி பந்துவீச்சாளரிடமே கேட்ச் கொடுத்து ஆட்டமிழந்தார்.
தொடர்ந்து அதிரடியாக விளையாடி வந்த ஷஃபாலி வர்மாவின் விக்கெட்டை வீழ்த்திய மகிழ்ச்சியில், பாகிஸ்தான் கேப்டன் ஃபாத்திமா சனா மிகுந்த ஆக்ரோஷத்துடன் கத்தி, ஷஃபாலி வர்மாவை டிரெஸ்ஸிங் ரூம் நோக்கிச் செல்லுமாறு சைகை காட்டினார். இந்த சம்பவம் தொடர்பான வீடியோ தற்போது சமூக வலைதளங்களில் வேகமாக வைரலாகி வருகிறது. இது பல ரசிகர்களிடையே கண்டனத்தை எழுப்பியுள்ளது.
அதே ஓவரின் கடைசி பந்தில் பிரதிகா ராவலையும் வீழ்த்திய ஃபாத்திமா சனா, தனது அடுத்த ஓவரில் ஸ்மிருதி மந்தனாவை எல்.பி.டபிள்யூ முறையில் வெளியேற்றி இந்திய அணிக்கு ஆரம்பக்கட்ட அதிர்ச்சியைக் கொடுத்தார். பவர்பிளே ஓவர்களுக்குள்ளேயே அவர் 3 விக்கெட்டுகளை வீழ்த்தி அசத்தினார். இது சர்வதேச டி20 போட்டியில் பவர்பிளேயில் ஃபாத்திமா சனா 3 விக்கெட்டுகளை வீழ்த்துவது இது இரண்டாவது முறையாகும். இதற்கு முன்பு கராச்சியில் ஜிம்பாப்வே அணிக்கு எதிராக அவர் இந்த சாதனையைப் படைத்திருந்தார்.
இதன் மூலம் டி20 கிரிக்கெட்டில் இப்படியொரு சாதனையை இரண்டு முறை செய்த முதல் பாகிஸ்தான் வீராங்கனை என்ற பெருமையை அவர் பெற்றார். மேலும், இந்திய மகளிர் அணிக்கு எதிராக பவர்பிளேயில் 3 விக்கெட்டுகளை வீழ்த்திய ஒட்டுமொத்த பந்துவீச்சாளர்களில் நான்காவது இடத்தையும் அவர் பிடித்துள்ளார். ஃபாத்திமா சனாவின் சிறப்பான பந்துவீச்சு ஒருபுறம் இருந்தாலும், பாகிஸ்தானின் மற்ற பந்துவீச்சாளர்களால் விக்கெட் எதுவும் வீழ்த்த முடியாததால் இந்திய அணியை அவர்களால் கட்டுப்படுத்த முடியவில்லை.
இறுதியில், இந்திய அணி 8.4 ஓவர்களிலேயே 3 விக்கெட் இழப்பிற்கு இலக்கை எட்டி 7 விக்கெட் வித்தியாசத்தில் அபார வெற்றி பெற்றது. இந்திய அணியின் கேப்டன் ஹர்மன்ப்ரீத் கவுர் 18 ரன்களுடனும், தீப்தி சர்மா 12 ரன்களுடனும் ஆட்டமிழக்காமல் களத்தில் இருந்து அணியின் வெற்றியை உறுதி செய்தனர்.
55 ரன்கள் மட்டுமே அடித்துவிட்டு, ஒரு விக்கெட் எடுத்த பிறகு இந்த ஓவர் சீன் தேவையா என்று பலரும் பாகிஸ்தான் வீராங்கனை ஃபாத்திமா சனாவை விமர்சித்து வருகின்றனர். ஷஃபாலியை அனுப்பிய விதம் சரியில்லை என்றும், இது கிரிக்கெட் வீரர்களுக்குரிய கண்ணியம் இல்லை என்றும் ரசிகர்கள் கருத்து தெரிவித்து வருகின்றனர். இந்த சம்பவம் கிரிக்கெட் உலகில் ஒரு புதிய விவாதத்தை உருவாக்கியுள்ளது.
