பீகார் மாநிலம் பூர்ணியா மாவட்டம், கேநகர் அருகே உள்ள சப்பாய் கிராமத்தில் வசிக்கும் மனோஜ் கோஸ்வாமி என்ற சிறு விவசாயி, தனது மூத்த மகள் ரியா குமாரி (பி.ஏ. முதலாண்டு மாணவி) வேறொரு சாதியைச் சேர்ந்த இளைஞரைக் காதலித்து திருமணம் செய்துகொண்டதால், உயிருடன் இருக்கும் மகளுக்கு பாடை கட்டி இறுதிச்சடங்கு செய்து உறவை முறித்துக் கொண்ட சம்பவம் பெரும் பரபரப்பை ஏற்படுத்தியுள்ளது.
கடந்த செப்டம்பர் 8-ஆம் தேதி வீட்டை விட்டு வெளியேறிய ரியா குமாரி, தனது காதலனுடன் சென்று திருமணம் செய்துகொண்டார். மகனைக் காணவில்லை என மனோஜ் கோஸ்வாமி காவல் நிலையத்தில் புகார் அளித்திருந்தார். இதனிடையே, டெல்லியில் இருந்த இருவரையும் காவல்துறையினர் மீட்டனர். நீதிமன்றத்தில் ஆஜர்படுத்தப்பட்ட ரியா, தனது விருப்பத்தின் பேரிலேயே காதலனுடன் சென்றதாகவும், அவருடனேயே வாழ விரும்புவதாகவும் வாக்குமூலம் அளித்தார்.
குடும்பத்தின் கௌரவத்தை சீரழித்துவிட்டதாகக் கூறி மனமுடைந்த மனோஜ் கோஸ்வாமி, மகளுடனான உறவை முற்றிலும் அறுத்துக்கொள்ள முடிவெடுத்தார். இதன்படி, திங்கள்கிழமை இரவு தனது மகளின் உருவப்பொம்மையைச் செய்து, அதில் மகளின் புகைப்படத்தையும் ஒட்டினார். செவ்வாய்க்கிழமை காலை, உயிருடன் இருக்கும் மகளுக்கு இறுதி ஊர்வலம் நடத்தப்படவுள்ளதாகக் கூறி கிராமமக்களுக்கு அழைப்பு விடுத்தார்.
பின்னர், இந்து பாரம்பரிய முறைப்படி பாடை அலங்கரிக்கப்பட்டு, கிராம மக்கள் முன்னிலையில் ஊர்வலமாக மயானத்திற்கு எடுத்துச் செல்லப்பட்டு, உருவப்பொம்மைக்கு தீ மூட்டி தகனம் செய்யப்பட்டது. மேலும், மகளுக்கான காரியச் சடங்குகளை (ஷ்ராத்தம்) முறைப்படி செய்யப் போவதாகவும் தந்தை அறிவித்துள்ளார்.
'எனது மகளின் உயர்கல்விக்காகவும் எதிர்காலத்திற்காகவும் பல கனவுகளை வைத்திருந்தேன். ஆனால், அவள் என் கனவுகளையும் குடும்பத்தின் கௌரவத்தையும் உடைத்துவிட்டாள். அதனால் தான் அவளுடனான உறவை முடிவுக்குக் கொண்டுவர இந்த முடிவை எடுத்தேன்' என தந்தை மனோஜ் கோஸ்வாமி வேதனையுடன் தெரிவித்தார்.
இந்தச் சம்பவம் அப்பகுதியில் பெரும் சோகத்தையும், நெகிழ்ச்சியையும் ஏற்படுத்தியுள்ளது. உயிருடன் இருக்கும் மகளுக்கு தந்தையே பாடை கட்டி இறுதிச்சடங்கு செய்த நிகழ்வு, குடும்ப உறவுகளின் சிக்கலான தன்மையை எடுத்துக்காட்டுகிறது.
மனோஜ் கோஸ்வாமியின் இந்த அதிரடி முடிவு, காதல் திருமணங்களால் ஏற்படும் குடும்பப் பிரச்சனைகள் மற்றும் சமூக அழுத்தங்கள் குறித்த விவாதங்களை மீண்டும் எழுப்பியுள்ளது. கிராம மக்களும் உறவினர்களும் இந்தச் சம்பவத்தால் அதிர்ச்சியடைந்துள்ளனர்.
