அமெரிக்காவில் பல லட்சம் சம்பளம் வாங்கிய விப்ரோ ஐடி வேலையைத் துறந்து, இந்தியா திரும்பி 'அக்ஷய கல்பா' என்ற இயற்கை பால் உற்பத்தி நிறுவனத்தைத் தொடங்கி, ஆண்டுக்கு ரூ.600 கோடி வருவாய் ஈட்டி சாதனை படைத்துள்ளார் பொறியாளர் சசி குமார். தொடக்கத்தில் தந்தையின் எதிர்ப்பு, கடுமையான நிதி நெருக்கடிகள் என பல சவால்களைச் சந்தித்தாலும், மனைவியின் உதவியுடன் அவர் இந்த நிறுவனத்தை வெற்றிகரமாக நடத்தியுள்ளார்.
பெங்களூரு பல்கலைக்கழகத்தில் பொறியியல் பட்டம் பெற்ற சசி குமார், விப்ரோ நிறுவனத்தில் சுமார் 12 ஆண்டுகள் பணியாற்றியுள்ளார். அமெரிக்காவில் தொழில்முறையாகப் பணியாற்றி வந்த நிலையில், விவசாயத்தின் மீது கொண்ட ஆழ்ந்த ஈர்ப்பால் தனது கார்ப்பரேட் வேலையை விட்டுவிட்டு இந்தியா திரும்பும் முடிவை எடுத்தார்.
பாரம்பரிய விவசாயக் குடும்பத்தைச் சேர்ந்த அவரது தந்தை, தான் பட்ட கஷ்டங்களை மகன் படக் கூடாது என்ற எண்ணத்தில், சசி குமாரின் இந்த திடீர் முடிவுக்குக் கடும் எதிர்ப்பு தெரிவித்தார். இதனால், சுமார் 8 ஆண்டுகள் தந்தையுடன் பேசாமல் இருந்தார். எனினும், தனது முடிவில் உறுதியாக இருந்த சசி குமார், விவசாயத்தில் நேரடியாகக் களமிறங்கி, 'அக்ஷய கல்பா' என்ற இயற்கை பால் மற்றும் விவசாய உற்பத்தி நிறுவனத்தைத் தொடங்கினார்.
ஆரம்ப காலகட்டம் அவருக்குச் சவால்கள் நிறைந்ததாகவே இருந்தது. நிறுவனம் தொடங்கி முதல் 9 ஆண்டுகளில், சுமார் 6 முறை கடுமையான நிதி நெருக்கடியைச் சந்தித்து, மூடப்படும் நிலைக்குச் சென்றது. அந்த இக்கட்டான சமயங்களில், சசி குமாரின் மனைவி தனது சொந்த சேமிப்பான ரூ.30 லட்சத்தை முதலீடு செய்து, நிறுவனத்தைக் காப்பாற்ற உதவினார்.
தற்போது, 'அக்ஷய கல்பா' நிறுவனம் மாதத்திற்கு ரூ.60 கோடி என ஆண்டுக்கு சுமார் ரூ.600 கோடி வருவாய் ஈட்டும் அளவுக்கு மகத்தான வளர்ச்சியை அடைந்துள்ளது. இந்த அபார வளர்ச்சிக்கு சசி குமாரின் விடாமுயற்சியும், அவரது மனைவியின் ஆதரவும் முக்கியக் காரணங்களாக அமைந்துள்ளன.
'அக்ஷய கல்பா' நிறுவனத்துடன் தற்போது 2,800 விவசாயிகள் இணைந்துள்ளனர். இந்த நிறுவனத்தின் மூலம், ஒவ்வொரு விவசாயக் குடும்பமும் மாதந்தோறும் சராசரியாக ரூ.1.28 லட்சம் வரை வருமானம் ஈட்டுகிறது. இதன் மூலம், ஆண்டுதோறும் விவசாயிகளுக்கு மட்டும் சுமார் ரூ.480 கோடி வரை நிறுவனம் வருவாயாக வழங்குகிறது.
பொறியாளர் சசி குமாரின் இந்த அசாதாரண வெற்றிக் கதையை, ஒரு எக்ஸ் பயனர் தனது சமூக வலைதளப் பக்கத்தில் பகிர்ந்துள்ளார். இந்தப் பதிவு தற்போது பல ஆயிரக்கணக்கானோரால் பார்க்கப்பட்டு, பாராட்டப்பட்டு வருகிறது. இது பல இளைஞர்களுக்கு ஒரு உத்வேகமாக அமைந்துள்ளது.
ஐடி துறையின் உயர் சம்பள வேலையை விட்டுவிட்டு, விவசாயத்தில் புதுமையான அணுகுமுறையுடன் ஈடுபட்டு, பெரும் லாபம் ஈட்டிய சசி குமாரின் கதை, இயற்கை விவசாயத்தின் முக்கியத்துவத்தையும், அதில் உள்ள சாத்தியக்கூறுகளையும் எடுத்துக்காட்டுகிறது.
