உங்கள் வீட்டு சமையலறையில் உள்ள கேஸ் ஸ்டவின் கருத்து போன பர்னரை எப்படி எளிதாக வீட்டிலேயே சுத்தம் செய்து தங்கம் போல மின்ன வைக்கலாம் என்பது குறித்த எளிய குறிப்புகள் இந்த தொகுப்பில் வழங்கப்பட்டுள்ளன. சமையலறையில் காய்கறிகளையும் பாத்திரங்களையும் கழுவுவது போலவே கேஸ் பர்னர்களையும் தவறாமல் சுத்தம் செய்வது அவசியம். அதில் சேரும் எண்ணெய் பிசுக்கு மற்றும் அழுக்குகளை நீக்காமல் சமைக்கும்போது, சப்பாத்தி போன்ற நேரடியாகத் தீயில் சுடப்படும் உணவுகளில் கிருமிகள் சேர வாய்ப்புள்ளது. எனவே, கேஸ் பர்னர்களை வீட்டிலேயே எளிதாக சுத்தம் செய்வது எப்படி என்பதை இங்கு காண்போம்.
பர்னரில் அதிகளவு கிரீஸ் அல்லது எண்ணெய் பிசுக்கு இருந்தால், ஒரு கப் சுடுநீரில் அரை கப் வினிகரைக் கலந்து பர்னரை சுமார் 30 நிமிடங்கள் ஊறவைக்க வேண்டும். பின்னர், பழைய பிரஷ்ஷால் தேய்த்து, துணியால் துடைத்தால் பிடிவாதமான கறைகளும் மறைந்துவிடும். இந்த முறை எண்ணெய் பிசுக்கை திறம்பட நீக்க உதவும்.
பர்னர் அதிக அழுக்காக இல்லை என்றால், வாரத்திற்கு ஒருமுறை பாத்திரம் தேய்க்கும் சோப்புடன் சிறிது கல் உப்பு கலந்து சுத்தம் செய்யலாம். ஸ்பான்ஜ் அல்லது பிரஷ்ஷால் தேய்த்தால் பர்னர் பளபளப்பாகிவிடும். மாதத்திற்கு இருமுறை இப்படிச் செய்வதன் மூலம் அதிக அழுக்கு சேர்வதைத் தடுக்கலாம்.
தீயில் கருகி கருத்துப்போன பர்னர்களுக்கு, இரண்டு ஸ்பூன் பேக்கிங் சோடாவுடன் பாதி எலுமிச்சைச் சாற்றைப் பிழிந்து பேஸ்ட் போலக் கலந்துகொள்ள வேண்டும். இதை பர்னரில் தடவி 20 நிமிடங்கள் ஊறவைத்து, பிரஷ்ஷால் தேய்த்தால் கருத்துப்போன பகுதி மீண்டும் பளபளக்கும். இந்த பேஸ்ட் கருகிய கறைகளை அகற்ற மிகவும் பயனுள்ளதாக இருக்கும்.
உடனடி பளபளப்பைப் பெற, சுடுநீரில் ஒரு பாக்கெட் ஈனோ (Eno) கலந்து, அதில் பர்னரை 15 முதல் 20 நிமிடங்கள் ஊறவைக்கலாம். பிறகு பிரஷ்ஷால் தேய்த்துக் கழுவலாம். பர்னரை மீண்டும் பயன்படுத்துவதற்கு முன் ஈரம் இல்லாமல் நன்றாக உலர வைப்பது மிகவும் அவசியம்.
ரசாயனங்கள் இல்லாத இயற்கை முறைக்கு, சுடுநீரில் 2 ஸ்பூன் மஞ்சள் தூள் மற்றும் 1 ஸ்பூன் கல் உப்பு கலந்து பர்னரை 20 நிமிடங்கள் ஊறவைத்துத் தேய்க்கலாம். இது கிருமிகளை அழிப்பதோடு, பிசுபிசுப்பையும் எளிதில் போக்கும்.
பர்னரைக் கழுவிய பிறகும் அதன் சிறிய துளைகளில் அழுக்கு அடைத்திருந்தால், பாப் பின் (Bob pin) அல்லது மெல்லிய கம்பியைக் கொண்டு குத்தி அடைப்பை நீக்க வேண்டும். இது கேஸ் வீணாகாமல் சீராக எரியவும், நீல நிற தீ வரவும் உதவும். இந்த எளிய குறிப்புகள் மூலம் உங்கள் கேஸ் பர்னரை எப்போதும் சுத்தமாகவும் பளபளப்பாகவும் வைத்திருக்கலாம்.
