ஜார்க்கண்ட் மாநிலம் ராஞ்சியில் உள்ள ஒரு மதுக்கடையில், மது குடித்து மயங்கிய நிலையில் ஒரு கர்ப்பிணி குரங்கு காணப்பட்ட சம்பவம் பெரும் பரபரப்பை ஏற்படுத்தியுள்ளது. இந்த குரங்கு மது பாட்டிலை திறந்து அதிலுள்ள மதுவை குடித்துவிட்டு, கடைக்குள் இருந்த பெட்டிகளின் மீது போதையில் படுத்துக்கிடந்த புகைப்படம் தற்போது இணையத்தில் வைரலாகி வருகிறது.
ராஞ்சியில் உள்ள மதுக்கடை ஊழியர்கள் பணியில் இருந்தபோது, திடீரென ஒரு கர்ப்பிணி குரங்கு ஒன்று கடைக்குள் புகுந்துள்ளது. முதலில், ஊழியர்கள் அதை விரட்ட முயன்றனர். அதன் கவனத்தை திசை திருப்ப பிஸ்கட்டுகளையும் கொடுத்தனர். ஆனால், அந்தக் குரங்கு ஒரு ஓட்கா பாட்டிலை எடுத்து, அதை உடைத்து, அதிலுள்ள மதுவை குடித்துவிட்டது.
மது அருந்திய சிறிது நேரத்திலேயே, அது கடைக்குள் இருந்த மது அட்டைப்பெட்டியின் மீது தூக்கக் கலக்கத்துடன் படுத்து உறங்கிவிட்டதாக ஊழியர்கள் தெரிவித்தனர். குரங்கின் இந்த வினோதமான நடத்தையைக் கண்டு அங்கிருந்தவர்கள் திகைத்துப்போனார்கள். மது அருந்திய பிறகு, அது கடைக்குள் நீண்ட நேரம் சுயநினைவின்றி கிடந்துள்ளது.
இந்த சம்பவத்தின்போது, குரங்கை விரட்ட முயன்ற கடை ஊழியர் ஒருவர் கடித்ததால், அவர் மருத்துவமனைக்கு சிகிச்சைக்காக அனுமதிக்கப்பட்டுள்ளார். குரங்கின் இந்த சேட்டைகளால் அப்பகுதியில் சிறிது நேரம் பரபரப்பு நிலவியது.
சம்பவத்தை நேரில் கண்டவர்கள் இந்த முழு நிகழ்வையும் தங்கள் கைபேசிகளில் படம்பிடித்து சமூக வலைத்தளங்களில் பதிவிட்டனர். இந்த புகைப்படங்கள் தற்போது இணையத்தில் வேகமாக பரவி வருகின்றன.
தகவலறிந்து சம்பவ இடத்திற்கு விரைந்த வனத்துறை மீட்புக் குழுவினர், மயங்கிய நிலையில் கிடந்த குரங்கை பத்திரமாக மீட்டுச் சென்றனர். மேலும், இது குறித்து வனத்துறையினர் விசாரணை மேற்கொண்டு வருகின்றனர்.
இந்த சம்பவம், மனிதர்கள் பயன்படுத்தும் மதுபானங்கள் விலங்குகளுக்கு எவ்வளவு ஆபத்தானது என்பதை மீண்டும் ஒருமுறை உணர்த்தியுள்ளது. விலங்குகள் நலன் குறித்த விழிப்புணர்வை ஏற்படுத்த வேண்டியதன் அவசியத்தையும் இது எடுத்துக்காட்டுகிறது.
