சென்னையில் செய்தியாளர்களிடம் பேசிய முன்னாள் அமைச்சர் டிஆர்பி ராஜா, தமிழ்நாட்டின் மானத்தை வெளிநாடுகளில் வாங்க வேண்டாம் என்று கடுமையாக விமர்சித்துள்ளார். "ரீல்ஸ் போட்டு ஆட்சிக்கு வந்தவர்கள், இன்று ரீல் விட்டே ஆட்சியை நடத்திக் கொண்டிருக்கிறார்கள். ஒவ்வொரு நாளும் புதுப்புது ரீல்களை விடுகிறார்கள். ரீல் எடுக்க இங்கு லொக்கேஷன் பத்தவில்லை என்றால் வெளிநாடுகளுக்குச் செல்லுங்கள். ஆனால், தமிழ்நாட்டின் மானத்தை வாங்காதீர்கள். கார் ரேஸ் போக வேண்டும் என்றால், அதைச் சொல்லிக்கொண்டு போக வேண்டியதுதானே? தமிழ்நாட்டை அவமானப்படுத்தாதீர்கள்" என்று அவர் ஆவேசமாகப் பேசினார்.
மருத்துவமனைக்கு முன்னால் இப்படி கூத்தடிப்பது சரியல்ல என்றும், இங்கிலாந்தில் வசிக்கும் தமிழர்கள், 'தமிழர்களின் பெயரை இப்படி கெடுத்துவிட்டீர்களே' என்று கவலை தெரிவிப்பதாகவும் டிஆர்பி ராஜா குறிப்பிட்டார். மேலும், ரூ.3,000 கோடி முதலீடு செய்யும் ஒரு நிறுவனத்தின் பெயரைக் கூட வெளியிடாமல் இருப்பது ஏன் என்றும் அவர் கேள்வி எழுப்பினார்.
தொழில் முதலீடு தொடர்பாக தவெக அரசு தினமும் ரீல்களை விடுவதாகவும், ஆனால் உண்மையான தொழில் முதலீடு எப்போது தமிழ்நாட்டிற்கு வரும் என்றும் அவர் வினவினார். திமுக ஆட்சியில் கொண்டுவரப்பட்ட முதலீடுகளை, தாங்கள் கொண்டுவந்ததாக தவெக அரசு கூறுவதாகவும் அவர் குற்றம் சாட்டினார். தமிழ்நாட்டின் வளர்ச்சியைப் பற்றிப் பேசும்போது, உண்மையான தகவல்களையும், முதலீடுகளையும் வெளிப்படையாக அறிவிக்க வேண்டும் என்பதே பலரது எதிர்பார்ப்பாக உள்ளது.
