கள்ளக்குறிச்சி மாணவியின் மரணம் தொடர்பாக நடிகர் விஜய் வாய் திறக்காதது குறித்து, திமுக எம்.எல்.ஏ. வசந்தம் கார்த்திகேயன் இரட்டை அர்த்தத்தில் ஆபாசமாக பேசிய வீடியோ தற்போது சமூக வலைத்தளங்களில் வேகமாக பரவி வருகிறது.
கள்ளக்குறிச்சியில் நடைபெற்ற கண்டன ஆர்ப்பாட்டத்தில் பேசிய ரிஷிவந்தியம் தொகுதி எம்.எல்.ஏ. வசந்தம் கார்த்திகேயன், "திமுக ஆட்சியில் ஏதேனும் சிறு தவறு நடந்தால் உடனடியாக பேஸ்புக், வாட்ஸ்அப் போன்றவற்றில் ரீல்ஸ் போடும் நீங்கள், கள்ளக்குறிச்சி மாணவியின் இறப்புக்கு ஏன் விஜய் வாய் திறக்கவில்லை? எங்களுக்கு ரத்தம் வந்தால் தக்காளி சட்னியா, உங்களுக்கு வந்தால் என்னவா? உங்கள் நடவடிக்கை இப்படித்தான் இருக்கிறது" என்று கடுமையாக விமர்சித்தார்.
மேலும் அவர், "சட்டமன்றத்தில் சட்டம் ஒழுங்கு குறித்து எதிர்க்கட்சித் தலைவர் உதயநிதி ஸ்டாலின் கேள்வி எழுப்பியபோது, முதல்வர் விஜய், கருணாநிதி, மிசா போன்ற பழைய விஷயங்களை பேசுகிறார். நாங்கள் எங்கள் ஆட்சிக்காலத்தில் கள்ளக்குறிச்சி மாவட்டத்துக்கு செய்த நலத்திட்டங்களை விட நீங்கள் அதிகமான திட்டங்களை அறிவித்திருந்தால் நான் ராஜினாமா செய்துவிட்டு வீட்டுக்கு செல்கிறேன்" என்று சவால் விடுத்தார்.
சட்டமன்றத்தில் முதல்வர் விஜயிடம் கேள்வி கேட்டால், அவருக்கு அருகில் இருப்பவர்கள் மட்டுமே பதிலளிப்பதாகவும், அதுவும் சம்பந்தமே இல்லாமல் பதில் கூறுவதாகவும் வசந்தம் கார்த்திகேயன் குற்றம் சாட்டினார். திமுக தலைவர் மு.க.ஸ்டாலின் வாய் கோணலாக இருப்பது உண்மைதான் என்றும், சிறையில் அடிபட்டு, மிதிபட்டு அவருக்கு வாய் கோணலாகிவிட்டது என்றும், ஆனால் விஜய்க்கும் வாய் கோணலாக இருப்பது ஏன் என்று தெரியவில்லை என்றும், "தினமும் அதற்கு வேலை கொடுத்தால் அப்படிதான்" என்றும் அவர் குறிப்பிட்டார். மேலும், "உனக்கு ஆன கோணல் வேறு, எங்களுக்கு ஆன கோணல் வேறு" என்றும் அவர் பேசினார்.
எதிர்த்து பேசினால் நேரு வீட்டில் ரெய்டு, வேலு வீட்டில் ரெய்டு, உதயநிதி கைது என காவல்துறை செயல்படுவதாகவும், எதுவாக இருந்தாலும் உன்னையும், உதயநிதியையும் சேர்த்து கைது செய்ய வேண்டும் என்றும் காவல்துறைக்கு கோரிக்கை விடுத்தார். ஏனெனில், இந்த விஷயங்கள் தங்களுக்கு மட்டுமே தெரியும் என்றும் அவர் கூறினார்.
இந்த வீடியோ தற்போது சமூக வலைத்தளங்களில் வைரலாகி பெரும் பரபரப்பை ஏற்படுத்தியுள்ளது. அரசியல் தலைவர்கள் மற்றும் பொதுமக்கள் மத்தியில் இது குறித்த விவாதங்கள் எழுந்துள்ளன.
