முகத்தில் உள்ள கரும்புள்ளிகள் பலருக்கும் பெரும் பிரச்சனையாக உள்ளது. அழகு நிலையங்களுக்கு செல்லாமலேயே, வீட்டிலுள்ள பொருட்களைக் கொண்டு கரும்புள்ளிகளை நீக்கி, பொலிவான முகத்தைப் பெற எளிய வழிகள் உள்ளன. இந்த குறிப்புகளை வாரத்திற்கு இரண்டு முறை பின்பற்றுவதன் மூலம் நல்ல பலனைப் பெறலாம்.
முதல் முறையில், ஒரு தேக்கரண்டி கஸ்தூரி மஞ்சளை எடுத்து, அதனுடன் தண்ணீர் அல்லது தேங்காய் எண்ணெய் சேர்த்து பேஸ்ட் பதத்திற்கு கலக்கவும். இந்த மஞ்சள் கலவையை முகத்தில் தடவி 10 முதல் 15 நிமிடங்கள் உலர விடவும். பின்னர் வெதுவெதுப்பான நீரில் முகத்தைக் கழுவினால், கரும்புள்ளிகள் படிப்படியாக மறையும்.
இரண்டாவது முறையில், ஒரு ஸ்பூன் ஜெலட்டின், இரண்டு ஸ்பூன் பால் மற்றும் அரை ஸ்பூன் எலுமிச்சை சாறு ஆகியவற்றை எடுத்துக் கொள்ளவும். இந்த மூன்று பொருட்களையும் நன்றாகக் கலந்து, சூடான நீரின் மேல் வைத்து (double boiling method) கலக்கவும். கண், புருவம் மற்றும் உதடுகளைத் தவிர்த்து முகத்தில் தடவி, 15 நிமிடங்கள் கழித்து தோல் போல் உரித்து எடுக்கவும். இது கரும்புள்ளிகள் மற்றும் முகத்தில் உள்ள தேவையற்ற முடிகளை நீக்க உதவும்.
மூன்றாவது முறையில், ஒரு ஸ்பூன் சர்க்கரை, இரண்டு டேபிள் ஸ்பூன் எலுமிச்சை சாறு மற்றும் ஒரு டேபிள் ஸ்பூன் தேன் ஆகியவற்றை ஒன்றாகக் கலக்கவும். இந்த கலவையை முகத்தில் தடவி ஐந்து நிமிடங்கள் மெதுவாக மசாஜ் செய்யவும். பின்னர் தண்ணீரில் கழுவவும். இந்த முறையை வாரத்திற்கு 2-3 முறை செய்வதன் மூலம் கரும்புள்ளிகள் விரைவில் மறைந்துவிடும்.
