ஜப்பானில் நடைபெற்று வரும் ஆசிய விளையாட்டுப் போட்டியில், 10 மீட்டர் ஏர் ரைபிள் துப்பாக்கி சுடும் போட்டியில் இந்திய மகளிர் அணிக்கு வெள்ளிப் பதக்கம் வென்று தந்ததோடு, தனிநபர் பிரிவிலும் வெள்ளிப் பதக்கம் வென்ற வீராங்கனை இளவேனில் வாலறிவனுக்கு தமிழக முதல்வர் விஜய் தனது நெஞ்சார்ந்த வாழ்த்துகளைத் தெரிவித்துள்ளார்.
இந்திய வீராங்கனைகளின் இந்த சாதனைகள் மிகவும் பாராட்டுக்குரியவை என்றும், இது இளம் தலைமுறையினருக்கு ஒரு சிறந்த உத்வேகத்தை அளிக்கும் என்றும் முதல்வர் விஜய் தனது வாழ்த்துச் செய்தியில் குறிப்பிட்டுள்ளார். இலக்கை நிர்ணயித்து, விடாமுயற்சியுடன் செயல்பட்டால் நிச்சயம் சாதிக்க முடியும் என்ற நம்பிக்கையையும், ஊக்கத்தையும் இந்த வெற்றி அளிக்கிறது.
இந்தியாவிற்குப் பெருமை சேர்த்துள்ள இந்த விளையாட்டு வீராங்கனைகளின் வெற்றிப் பயணம் மேலும் பல புதிய வரலாறுகளைப் படைக்கட்டும் என முதல்வர் விஜய் வாழ்த்தியுள்ளார். இந்தச் செய்தியை அவர் தனது அதிகாரப்பூர்வ சமூக வலைத்தளப் பக்கங்களில் பகிர்ந்துள்ளார்.
யார் இந்த இளவேனில் வாலறிவன்?
ஆசிய விளையாட்டுப் போட்டியில் துப்பாக்கி சுடும் பிரிவில் (10 மீ., 'ஏர் ரைபிள்') இந்திய வீராங்கனை இளவேனில் வாலறிவன், இரண்டு வெள்ளிப் பதக்கங்களை வென்று அசத்தியுள்ளார். 27 வயதான இளவேனில், தமிழ்நாட்டின் கடலூர் மாவட்டத்தைச் சேர்ந்தவர்.
குஜராத் பல்கலைக்கழகத்தில் பயின்ற இவர், இதற்கு முன்னர் ஆசிய சாம்பியன்ஷிப், உலகக் கோப்பை, உலகக் கோப்பை இறுதிப் போட்டி, உலக சாம்பியன்ஷிப் போன்ற பல்வேறு சர்வதேசப் போட்டிகளில் பல பதக்கங்களை வென்றுள்ளார். ஆசிய விளையாட்டுகளில் இவர் பதக்கம் வெல்வது இதுவே முதல் முறையாகும்.
மேலும், இளவேனில் வாலறிவன் இரண்டு முறை (2020 மற்றும் 2024 ஆம் ஆண்டுகளில்) ஒலிம்பிக் போட்டிகளிலும் பங்கேற்றுள்ளார். கடந்த 2022 ஆம் ஆண்டு, இந்திய அரசின் உயரிய விருதுகளில் ஒன்றான அர்ஜுனா விருதையும் இவர் பெற்றுள்ளார். இவரது இந்தச் சாதனைகள் தமிழகத்திற்கும் இந்தியாவிற்கும் பெருமை சேர்த்துள்ளன.
