தமிழக முதல்வர் விஜய் அவர்கள் நாளை சென்னையில் இருந்து விமானம் மூலம் கோவை மாநகரத்திற்கு வருகை தர உள்ளார். இந்த வருகையானது கோவையில் நடைபெற உள்ள ஒரு முக்கிய நிகழ்விற்காக ஏற்பாடு செய்யப்பட்டுள்ளது.
நாளை காலை 11:00 மணிக்கு சென்னையில் இருந்து புறப்படும் முதல்வர் விஜய், காலை 11:45 மணியளவில் கோவை காந்திபுரத்தில் அமையப்பெற்றுள்ள பெரியார் அறிவுலகத்தை வந்தடைவார். இந்த அறிவுலகம் ரூபாய் 300 கோடி ரூபாய் மதிப்பீட்டில் பிரம்மாண்டமாக கட்டப்பட்டுள்ளது.
பெரியார் அறிவுலகத்தில், முதல்வர் விஜய் அவர்கள் கல்வெட்டை திறந்து வைத்து, அறிவுலகத்தை பார்வையிடுவார். குறிப்பாக, விண்வெளியில் செல்வது போன்ற அனுபவத்தை தரக்கூடிய ஸ்பேஸ் லிப்ட் வசதி அங்கு ஏற்படுத்தப்பட்டுள்ளது. இந்த லிப்ட் மூலம் அனைத்து தளங்களுக்கும் முதல்வர் பயணிப்பாரா என்பது அன்றைய தினம் அவர் எடுக்கும் முடிவைப் பொறுத்தது.
மேலும், அறிவுலகத்தின் இரண்டாவது தளத்தில் மாநகராட்சி பள்ளி மாணவ மாணவியருடன் கலந்துரையாடல் நடத்தவும் ஆலோசனைகள் நடைபெற்று வருகின்றன. அறிவுலக வளாகத்தில் பிரத்யேக மேடை ஒன்றும் அமைக்கப்பட்டுள்ளது. இங்கு, ஏற்கனவே நிறைவடைந்த பணிகளை தொடங்கி வைத்து, புதிய திட்டப் பணிகளுக்கு முதல்வர் அடிக்கல் நாட்ட உள்ளார்.
இந்த நிகழ்ச்சியில், 100க்கும் மேற்பட்ட பயனாளிகளுக்கு நலத்திட்ட உதவிகள் முதல்வர் விஜய் அவர்களால் வழங்கப்பட உள்ளன. இந்த விழா மதியம் 1:05 மணி வரை நடைபெறும் வகையில் விரிவான ஏற்பாடுகள் செய்யப்பட்டுள்ளன.
விழா நிறைவடைந்ததும், மதியம் 1:06 மணிக்கு காந்திபுரத்தில் இருந்து புறப்படும் முதல்வர், சுமார் 1:40 மணியளவில் கோவை விமான நிலையத்தை சென்றடைவார். விமான நிலையத்தில் இருந்து காந்திபுரம் வரை சாலை மார்க்கமாக காரில் வர இருக்கிறார். இந்த பயணத்தின் போது, சாலை ஓரத்தில் காத்திருக்கும் மக்களுக்காக ரோட் ஷோ நடத்தவும் திட்டமிடப்பட்டுள்ளதாக தகவல்கள் தெரிவிக்கின்றன.
