சத்தீஸ்கர் மாநிலம் ராய்கட் மாவட்டத்தில் காட்டு யானைகளின் தாக்குதல் சம்பவங்கள் அதிகரித்து வருவதால் மக்கள் மத்தியில் பெரும் அச்சம் நிலவுகிறது. குறிப்பாக, ஒரே நாளில் அடுத்தடுத்து இரண்டு பேர் யானை தாக்குதலுக்கு பலியான சம்பவம் பெரும் சோகத்தை ஏற்படுத்தியுள்ளது.
ராய்கட் மாவட்டத்தின் தஹலொன் கிராமத்தில், ஒரு காட்டு யானை திடீரென கிராமத்திற்குள் புகுந்து வீடுகளை சேதப்படுத்தியுள்ளது. அப்போது, சகுந்தலா பாய் என்ற பெண்மணி தனது வீட்டில் இருந்தபோது, யானை வீட்டை முற்றுகையிட்டது. யானையின் தாக்குதலில் இருந்து தப்பிக்க முயன்றபோது, அவர் பரிதாபமாக உயிரிழந்தார். அதிர்ஷ்டவசமாக, அவரது மகள் சிறு காயங்களுடன் உயிர் தப்பினார்.
இந்த துயரச் சம்பவம் நடந்து சில மணி நேரங்களிலேயே, அதே ராய்கட் மாவட்டத்தில் மற்றொரு கொடூர சம்பவம் அரங்கேறியுள்ளது. அரனுரா கிராமத்தின் வனப்பகுதிக்கு இயற்கை உபாதை கழிக்க சென்ற கூலித்தொழிலாளி பந்தன் சிங் என்பவரையும் காட்டு யானை ஒன்று தாக்கியுள்ளது. இந்த தாக்குதலில் பந்தன் சிங் சம்பவ இடத்திலேயே பரிதாபமாக உயிரிழந்தார்.
தொடர்ச்சியாக நடைபெறும் இந்த யானை தாக்குதல் சம்பவங்களால் ராய்கட் மாவட்ட மக்கள் பெரும் பீதியில் ஆழ்ந்துள்ளனர். வனப்பகுதிகளில் இருந்து கிராமங்களுக்குள் புகுந்து வரும் காட்டு யானைகளை கட்டுப்படுத்தவும், பொதுமக்களின் பாதுகாப்பை உறுதி செய்யவும் உரிய நடவடிக்கை எடுக்க வேண்டும் என கோரிக்கை விடுத்துள்ளனர்.
வனத்துறை அதிகாரிகள் இதுகுறித்து விசாரணை மேற்கொண்டு வருகின்றனர். யானைகள் கிராமங்களுக்குள் புகுவதைத் தடுக்கவும், பொதுமக்களுக்கு பாதிப்பு ஏற்படாமல் இருக்கவும் சிறப்பு கண்காணிப்பு குழுக்கள் அமைக்கப்படும் என எதிர்பார்க்கப்படுகிறது. இந்த சம்பவங்கள் வனவிலங்கு-மனித மோதல் குறித்த கவலைகளை மீண்டும் எழுப்பியுள்ளது.
