சென்னை சூப்பர் கிங்ஸ் அணியின் பேட்டிங் பயிற்சியாளராக செயல்பட்டு வரும் மைக்கேல் ஹசிக்கு, ஆஸ்திரேலியா மற்றும் இங்கிலாந்து கிரிக்கெட் வாரியங்களிடமிருந்து கடும் போட்டி நிலவி வருகிறது. இரு அணிகளும் அவரை தங்கள் பேட்டிங் பயிற்சியாளராக ஒப்பந்தம் செய்ய தீவிரமாக முயற்சி செய்து வருகின்றன.
'மிஸ்டர் கிரிக்கெட்' என்று அன்புடன் அழைக்கப்படும் முன்னாள் ஆஸ்திரேலிய வீரரான மைக்கேல் ஹசி, தற்போது சர்வதேச கிரிக்கெட் உலகில் மிகவும் மதிக்கப்படும் பயிற்சியாளர்களில் ஒருவராக உயர்ந்துள்ளார். தனது சிறப்பான டெஸ்ட் கிரிக்கெட் வாழ்க்கையில் 51.5 என்ற சராசரியுடன் வலம் வந்த ஹசியை, ஆஸ்திரேலியா மற்றும் இங்கிலாந்து ஆகிய இரு நாடுகளின் தேசிய அணிகளும் தங்கள் பேட்டிங் பயிற்சியாளராக நியமிக்க ஆர்வம் காட்டி வருகின்றன.
குறிப்பாக, இங்கிலாந்து டெஸ்ட் அணியின் புதிய தலைமைப் பயிற்சியாளரான ஸ்டீபன் பிளெமிங், சிஎஸ்கே அணியில் நீண்ட காலமாக அவருடன் இணைந்து பணியாற்றிய அனுபவத்தின் அடிப்படையில், மைக்கேல் ஹசியை இங்கிலாந்து அணியுடன் இணைத்துக் கொள்ள மிகுந்த விருப்பம் தெரிவித்துள்ளதாக தகவல்கள் வெளியாகியுள்ளன. இது குறித்து பேசிய ஹசி, பிளெமிங் தன்னிடம் இது குறித்து பேசியதை உறுதிப்படுத்தினார். 'நாங்கள் இருவரும் மிகச் சிறந்த முறையில் இணைந்து பணியாற்றியுள்ளோம். அவர் என்னிடம் தற்செயலாகப் பேசும்போது, இங்கிலாந்து அணியின் பேட்டிங் பயிற்சியாளராகப் பொறுப்பேற்பது குறித்து என்ன நினைக்கிறீர்கள்? என்று கேட்டார். கிரிக்கெட்டில் எதற்கும் நான் இல்லை என்று சொல்ல மாட்டேன்' என ஹசி தனது விருப்பத்தை வெளிப்படுத்தினார்.
இருப்பினும், மைக்கேல் ஹசி இங்கிலாந்து அணியில் இணைவதைத் தடுக்கும் நோக்கில், ஆஸ்திரேலிய கிரிக்கெட் வாரியம் அவருக்கு அவசரமாக ஒரு வாய்ப்பை வழங்கியுள்ளதாக ஆஸ்திரேலிய ஊடகங்கள் செய்தி வெளியிட்டுள்ளன. தற்போது, ஆஸ்திரேலியா மற்றும் இங்கிலாந்து ஆகிய இரு அணிகளின் பேட்டிங் வரிசையும் சற்று தடுமாற்றத்துடனேயே காணப்படுகிறது. ஆஸ்திரேலிய அணியில் அனுபவ வீரர்கள் பலர் இருந்தபோதிலும், வங்கதேசத்திற்கு எதிரான முதல் டெஸ்டில் அவர்களின் பேட்டிங் பலவீனம் வெளிப்பட்டது.
நடப்பு உலக டெஸ்ட் சாம்பியன்ஷிப் சுழற்சியில், இங்கிலாந்து பேட்ஸ்மேன்களின் சராசரி 31.12 ஆக உள்ள நிலையில், ஆஸ்திரேலிய பேட்ஸ்மேன்களின் சராசரி 27.84 ஆக மட்டுமே உள்ளது. இந்த புள்ளிவிவரங்கள் இரு அணிகளின் பேட்டிங் பலவீனத்தை உணர்த்துகின்றன.
இந்தச் சூழலில், இந்திய அணியின் முன்னாள் கேப்டனும், முன்னாள் தேர்வுக்குழு தலைவருமான கிருஷ்ணமாச்சாரி ஸ்ரீகாந்த், மைக்கேல் ஹசிக்கு ஒரு முக்கிய அறிவுரையை வழங்கியுள்ளார். அவர் மீண்டும் பிளெமிங்குடன் இணைவது ஒரு தவறு என்று ஸ்ரீகாந்த் குறிப்பிட்டுள்ளார்.
'மைக்கேல் ஹசி அந்த தவறை செய்ய வேண்டாம் என்று நான் அறிவுறுத்துகிறேன். அவர் மீண்டும் ஸ்டீபன் பிளெமிங்குடன் இணைந்து பணியாற்ற வேண்டியிருக்கும். அதற்கு பதிலாக அவர் சிஎஸ்கே அணியிலேயே தொடர வேண்டும், ஏனெனில் அவர்கள் அவரை மிகச் சிறப்பாக கவனித்துக் கொள்வார்கள். பிளெமிங்கிற்கு வேறு வேலை இல்லை, அவர் பல்வேறு இடங்களுக்குச் சென்று ஹசியை மட்டுமே அழைக்கிறார்' என்று ஸ்ரீகாந்த் தனது யூடியூப் சேனலில் பேசியுள்ளார். ஹசியின் எதிர்கால முடிவு என்னவாக இருக்கும் என்பதை பொறுத்திருந்துதான் பார்க்க வேண்டும்.
