பெருநகர சென்னை மாநகராட்சி, பொதுமக்கள், வணிக நிறுவனங்கள், கல்வி நிறுவனங்கள் மற்றும் பெருமளவு கழிவு உற்பத்தியாளர்கள் ஆகியோருக்கு ஒரு முக்கிய வேண்டுகோளை விடுத்துள்ளது. தமிழ்நாடு முதலமைச்சரின் அறிவுறுத்தலின்படி, மாநிலத்தில் திடக்கழிவு மேலாண்மைப் பணிகளை மேம்படுத்தும் நோக்கில், கழிவுகளை உருவாகும் இடத்திலேயே முறையாகப் பிரித்து ஒப்படைக்குமாறு வலியுறுத்தப்பட்டுள்ளது. இந்த நடவடிக்கை, திடக்கழிவுகளை திறம்பட கையாள்வதற்கும், சுற்றுச்சூழலைப் பாதுகாப்பதற்கும், பொது சுகாதாரத்தை மேம்படுத்துவதற்கும் அவசியமானதாகும்.
திடக்கழிவு மேலாண்மை விதிகள், 2026-இன்படி, கழிவுகளை நான்கு முக்கிய வகைகளாகப் பிரித்து வழங்க வேண்டும். இதில், உணவுக் கழிவுகள், காய்கறி மற்றும் பழத்தோல்கள் போன்ற மக்கும் கழிவுகள் பச்சை நிறத் தொட்டியிலும், காகிதம், பிளாஸ்டிக், உலோகம் போன்ற மக்காத கழிவுகள் நீல நிறத் தொட்டியிலும் சேகரிக்கப்பட வேண்டும். மேலும், சானிட்டரி நாப்கின்கள், டயப்பர்கள் போன்ற சுகாதாரக் கழிவுகள் சிவப்பு நிறத் தொட்டியிலும், பேட்டரிகள், மின் விளக்குகள், காலாவதியான மருந்துகள் போன்ற அபாயகரக் கழிவுகள் கருப்பு நிறத் தொட்டியிலும் தனியாக வழங்கப்பட வேண்டும்.
கழிவுகளை உருவாகும் இடத்திலேயே தரம் பிரிப்பது ஒவ்வொரு தனிநபரின் பொறுப்பு என்று மாநகராட்சி தெரிவித்துள்ளது. இதன் மூலம், மக்கும் கழிவுகளை உரமாக மாற்றவும், மறுசுழற்சி செய்யக்கூடிய பொருட்களை மீட்டெடுக்கவும், குப்பைக் கிடங்குகளுக்குச் செல்லும் கழிவுகளின் அளவைக் குறைக்கவும் முடியும். இது சுற்றுச்சூழலைப் பாதுகாப்பதோடு, பொது சுகாதாரத்தையும் மேம்படுத்தும்.
சென்னை மாநகராட்சியின் அனைத்து 200 வார்டுகளிலும், வீடுகள்தோறும் தரம் பிரிக்கப்பட்ட கழிவுகளை சேகரிக்க தூய்மைப் பணியாளர்களுக்கு அறிவுறுத்தப்பட்டுள்ளது. இதற்காக, மாநகராட்சியின் பேட்டரி மூலம் இயக்கப்படும் கழிவு சேகரிப்பு வாகனங்களில் (Battery Operated Vehicles – BOVs), கழிவுகளின் நான்கு வகைகளையும் தனித்தனியாக சேகரிப்பதற்காக நான்கு வண்ண அடையாளங்களுடன் கூடிய தனித்தனி குப்பைத் தொட்டிகள் (Compartments) பொருத்தப்பட்டுள்ளன.
எனவே, பொதுமக்கள், வணிக நிறுவனங்கள், கல்வி நிறுவனங்கள், அலுவலகங்கள் மற்றும் பெருமளவு கழிவு உற்பத்தியாளர்கள் அனைவரும் தரம் பிரிக்கப்பட்ட கழிவுகளை மட்டுமே பெருநகர சென்னை மாநகராட்சி தூய்மைப் பணியாளர்களிடம் ஒப்படைக்குமாறு அன்புடன் கேட்டுக்கொள்ளப்படுகிறார்கள். கழிவுகளை முறையாகப் பிரிக்கத் தவறினால், சட்டப்படியான அபராதம் மற்றும் பிற நடவடிக்கைகள் எடுக்கப்படும் எனவும் எச்சரிக்கப்பட்டுள்ளது.
பெருநகர சென்னை மாநகராட்சி, கழிவுகளை உருவாகும் இடத்திலேயே பிரித்தல் மற்றும் அறிவியல் முறையிலான திடக்கழிவு மேலாண்மையை ஊக்குவிக்கும் வகையில், பல்வேறு விழிப்புணர்வு நிகழ்ச்சிகள், தகவல்கல்விதொடர்பு (IEC) நடவடிக்கைகள், பள்ளிகள் மற்றும் சமூக அமைப்புகள் மூலம் தொடர்ச்சியான விழிப்புணர்வு பணிகளை மேற்கொண்டு வருகிறது. தூய்மையான, ஆரோக்கியமான மற்றும் நிலைத்தன்மை வாய்ந்த சென்னையை உருவாக்குவதில் பொதுமக்களின் பங்கு மிகவும் முக்கியமானது.
'திடக்கழிவுகளை உருவாகும் இடத்திலேயே தரம் பிரிப்போம்! தூய்மையான, பசுமையான, ஆரோக்கியமான சென்னையை உருவாக்குவோம்!!' என்ற முழக்கத்துடன், பொதுமக்கள் அனைவரும் மாநகராட்சிக்கு முழு ஒத்துழைப்பு வழங்குமாறு கேட்டுக்கொள்ளப்படுகிறார்கள். இந்த கூட்டு முயற்சி, சென்னையை மேலும் தூய்மையாகவும், வாழத் தகுந்த இடமாகவும் மாற்ற உதவும்.
