சமூக நலத்துறை அமைச்சர் பல்வேறு இடங்களில் ஆய்வு மேற்கொண்டபோது, சாதிச் சான்றிதழ் பெறுவதில் கால தாமதம் ஏற்படுவதாக பொதுமக்கள் தரப்பிலிருந்து பல புகார்கள் எழுந்தன. இந்தப் புகார்களின் அடிப்படையில், சமூகநீதித்துறை ஒரு முக்கிய உத்தரவைப் பிறப்பித்துள்ளது. அதன்படி, ஆதிதிராவிடர்களுக்கு 2 நாட்களிலும், பழங்குடியின மக்களுக்கு ஒரு வாரத்திலும் சாதிச் சான்றிதழ் வழங்கப்பட வேண்டும் என்றும், எந்தக் காரணத்தைக் கொண்டும் கால தாமதம் செய்யக்கூடாது என்றும் அறிவுறுத்தப்பட்டுள்ளது.
புதிய உத்தரவின்படி, சான்றிதழ் வழங்குவது தொடர்பாக ஏதேனும் சந்தேகங்கள் எழுந்தால், விண்ணப்பம் பெறப்பட்ட 15 நாட்களுக்குள் அது குறித்த மனுக்களை ஆய்வு செய்து சான்றிதழ் வழங்க வேண்டும். ஒருவேளை, மனுதாரருக்கு சான்றிதழ் அளிக்க சாத்தியக்கூறு இல்லை என்றாலும், அது குறித்த தெளிவான விளக்கத்தை மனுதாரருக்கு அளிக்க வேண்டும் என்றும் தெரிவிக்கப்பட்டுள்ளது.
ஆதிதிராவிடர் மற்றும் பழங்குடியின மக்கள் சான்றிதழ் கேட்டு விண்ணப்பிக்கும் மனுக்கள் மீது உடனடியாக நடவடிக்கை எடுக்க வேண்டும். மேலும், இந்தச் செயல்பாட்டில் கால தாமதம் ஏற்பட்டால், சம்பந்தப்பட்ட அதிகாரிகளின் மீது துறை சார்ந்த நடவடிக்கை எடுக்கப்படும் என்றும் எச்சரிக்கை விடுக்கப்பட்டுள்ளது. இந்தத் தகவலைத் தொடர்ந்து, அனைத்து மாவட்ட ஆட்சியர்களுக்கும் சமூகநலத்துறை சார்பில் கடிதங்கள் அனுப்பப்பட்டுள்ளன.
இந்த புதிய உத்தரவின் மூலம், ஆதிதிராவிடர் மற்றும் பழங்குடியின மக்கள் தங்கள் சாதிச் சான்றிதழ்களுக்காக நீண்ட காலம் காத்திருக்க வேண்டிய சூழலில் இருந்து விடுபட்டுள்ளனர். இது அவர்களின் பல்வேறு தேவைகளுக்கு உடனடியாக உதவிகரமாக இருக்கும் என எதிர்பார்க்கப்படுகிறது.
சமூக நீதித் துறை வெளியிட்டுள்ள வழிகாட்டு நெறிமுறைகள் பின்வருமாறு:
* ஆதிதிராவிட மக்கள் சாதிச் சான்றிதழ் பெற விண்ணப்பித்தால், அதிகாரிகள் அதனை 2 நாட்களுக்குள் வழங்க வேண்டும்.
* பழங்குடியின மக்களுக்கு, விண்ணப்பம் பெறப்பட்ட 7 நாட்களுக்குள் சாதிச் சான்றிதழ் வழங்கப்பட வேண்டும்.
* SC/ST சமூகத்தினருக்கு சாதிச் சான்றிதழ் வழங்குவதில் எந்தவிதமான கால தாமதமும் இருக்கக் கூடாது.
* சாதிச் சான்றிதழ் வழங்குவதில் கால தாமதம் ஏற்பட்டால், சம்பந்தப்பட்ட அதிகாரிகளின் மீது துறை சார்ந்த நடவடிக்கை பாயும்.
