நிஜ உலகின் ஒரு புரட்சியாகவே உருமாற்றிவிட்டீர்கள் என்று முதல்வர் விஜய்க்கு விவேக் ஓபராய் வாழ்த்து தெரிவித்துள்ளார்.
தமிழக முதல்வராக பதவியேற்றுள்ளார் விஜய். இந்த பதவியேற்பு விழாவில் காங்கிரஸ் கட்சியைச் சேர்ந்த ராகுல் காந்தி சிறப்பு விருந்தினராக கலந்து கொண்டார். மேலும் தவெக கட்சியினர், விஜய் குடும்பத்தினர், த்ரிஷா உள்ளிட்ட பலர் கலந்து கொண்டனர். இந்த விழாவில் தமிழக முதல்வராக விஜய் பேசிய பேச்சு, விஜய்யின் செல்ஃபி வீடியோ உள்ளிட்ட விஷயங்கள் இணையத்தில் ட்ரெண்ட்டாகி வருகின்றன.
தற்போது தமிழக முதல்வர் விஜய்க்கு வாழ்த்து தெரிவிக்கும் விதமாக முன்னணி நடிகரான விவேக் ஓபராய் தனது எக்ஸ் தளத்தில், “என் சகோதர் விஜய், இது சாத்தியமே இல்லை என்று அவர்கள் சொன்னார்கள். இது வெறும் “ரசிகர்களின் ஆரவாரம்” மட்டுமே என்று அவர்கள் இகழ்ந்தார்கள். ஆனால், இப்போது உங்களைப் பாருங்கள்! “என்ன நண்பா, சொல்லி அடித்தோம் அல்லவா!” அந்த வார்த்தைகளை திரையிலிருந்து நீங்கள் எடுத்து, இந்த மண்ணின் வரலாற்றிலேயே பொறித்துவிட்டீர்கள்.
அந்தத் தீவிரமான திரையுலகச் சக்தியை நீங்கள் எடுத்துக்கொண்டு, அதை நிஜ உலகின் ஒரு புரட்சியாகவே உருமாற்றிவிட்டீர்கள். அந்த கர்ஜனை நிஜமானது. இந்த வெற்றி வரலாற்றுச் சிறப்புமிக்கது, எதிர்காலம் உங்களுக்கே சொந்தம். உங்களைக் குறித்துப் பெருமை கொள்கிறேன், முதல்வர் விஜய்க்கு வாழ்த்துகள்” என்று தெரிவித்துள்ளார் விவேக் ஓபராய்.
