வங்கி வாடிக்கையாளர்கள் கவனத்தில் கொள்ள வேண்டிய முக்கிய அறிவிப்பு வெளியாகியுள்ளது. செப்டம்பர் 28, 29, 30 ஆகிய மூன்று தினங்களில் நடைபெறவிருக்கும் வேலைநிறுத்தத்தை சமாளிக்கும் விதமாக, செப்டம்பர் 27ஆம் தேதி ஞாயிற்றுக்கிழமை அன்று வங்கிக் கிளைகளைத் திறக்க நிர்வாகம் முடிவு செய்துள்ளது. இந்த நிலையில், ஞாயிற்றுக்கிழமை அன்று பணிக்கு வருமாறு வங்கி அதிகாரிகளுக்கு அழுத்தம் கொடுக்கப்படுவதாக தகவல்கள் தெரிவிக்கின்றன.
ஆனால், அகில இந்திய யூனியன் வங்கி அதிகாரிகள் ஊழியர் சங்கத்தின் (All India Union Bank Officer Staff Association – AIUBOSA) பொதுச் செயலாளர் டி.எஸ்.கணேசன் இதுகுறித்து வெளியிட்டுள்ள அறிக்கையில், அகில இந்திய வங்கி அதிகாரிகள் சங்கம் (All India Bank Officers’ Association – AIBOA) ஏற்கனவே செப்டம்பர் 27ஆம் தேதி அலுவலகங்களுக்குச் செல்ல வேண்டாம் என்று அறிவுறுத்தியுள்ளதாகத் தெரிவித்துள்ளார். எனவே, வங்கி அதிகாரிகள் நாளை பணிக்குச் செல்ல மாட்டார்கள் என்றும் அவர் குறிப்பிட்டுள்ளார்.
மேலும், ஞாயிற்றுக்கிழமை பணிக்கு வருமாறு நிர்வாகத்திடமிருந்து எழுத்துப்பூர்வ உத்தரவு ஏதேனும் வந்தால் அல்லது அதிகாரிகளுக்கு அழுத்தம் கொடுக்கப்பட்டால், உடனடியாக சங்கத்தின் கவனத்திற்குக் கொண்டு வர வேண்டும் என்றும் அறிவுறுத்தப்பட்டுள்ளது. இதனால், வங்கி வாடிக்கையாளர்கள் இந்த அறிவிப்புகளை கவனத்தில் கொள்ளுமாறு கேட்டுக்கொள்ளப்படுகிறார்கள். வேலைநிறுத்தத்தை முன்னிட்டு வங்கிகளின் செயல்பாடுகளில் சில மாற்றங்கள் ஏற்பட வாய்ப்புள்ளது.
