அவிநாசி நகராட்சியில் பொது இடங்களில் குப்பைகளை வீசுபவர்களுக்கு அபராதம் விதிக்கப்படும் என நகராட்சி ஆணையர் பாலமுருகன் எச்சரிக்கை விடுத்துள்ளார். தூய்மையான நகராட்சியை உருவாக்கும் நோக்கில், திடக்கழிவு மேலாண்மை விதிகள் 2026-ஐ சிறப்பாக செயல்படுத்தும் வகையில், குப்பைகளை நான்கு வகைகளாகப் பிரித்து சேகரிக்கும் புதிய நடைமுறை தீவிரப்படுத்தப்பட்டுள்ளது.
அவிநாசி நகராட்சி ஆணையர் பாலமுருகன், தூய்மைப் பணியாளர்கள் பொதுமக்களிடமிருந்து சேகரித்த மக்கும் குப்பை, மக்காத குப்பை ஆகியவற்றை அவிநாசி திடக்கழிவு மேலாண்மை வள மீட்பு பூங்காவில் நேரில் சென்று ஆய்வு செய்தார். இந்த ஆய்வின்போது, நகராட்சி சுகாதார ஆய்வாளர் அரவிந்தன், சுகாதார மேற்பார்வையாளர்கள் கோமதி, சிவசங்கர், மாதையன் ஆகியோர் உடனிருந்தனர்.
ஆய்வின்போது பேசிய ஆணையர் பாலமுருகன், அவிநாசி நகராட்சியை தூய்மையான நகராட்சியாக மாற்ற பொதுமக்கள் குப்பைகளை நான்கு வகைகளாக தரம் பிரித்து வழங்க வேண்டும் என்றும், பொது இடங்களில் குப்பைகளை வீசினால் அபராதம் விதிக்கப்படும் என்றும் எச்சரிக்கை விடுத்தார். ஒன்றிய சுற்றுச்சூழல் அமைச்சகத்தால் அறிவிக்கப்பட்ட திடக்கழிவு மேலாண்மை விதிகள் அமலுக்கு வந்துள்ளதாகவும், அதன்படி குப்பைகளை மூலத்திலேயே நான்கு வகையாகப் பிரிப்பது கட்டாயமாக்கப்பட்டுள்ளதாகவும் அவர் குறிப்பிட்டார்.
இதன்படி, ஈரக் கழிவுகளான சமையலறை கழிவுகள், காய்கறி மற்றும் பழத்தோல்கள்; உலர் கழிவுகளான பிளாஸ்டிக், காகிதம், உலோகம், கண்ணாடி; சுகாதாரக் கழிவுகளான டயப்பர்கள், சானிட்டரி நாப்கின்கள்; மற்றும் சிறப்பு பராமரிப்புக் கழிவுகளான பியூஸ் போன பல்புகள், டியூப் லைட்டுகள், பேட்டரிகள், காலாவதியான மருந்துகள் போன்றவற்றை தனித்தனியாகப் பிரித்து வழங்க வேண்டும். குப்பைகள் சேகரிக்கப்படுவது முதல் முறையாக அழிக்கப்படுவது வரை ஒன்றிய மாசுக் கட்டுப்பாட்டு வாரியத்தின் இணையதளம் மூலம் கண்காணிக்கப்படும் என்றும் அவர் தெரிவித்தார்.
புதிய விதிகளின் அடிப்படையில், வீடுகள், வணிகப் பகுதிகள், பள்ளிகள், கல்லூரிகள், தொழிற்சாலைகள், சந்தைப் பகுதிகள், தெருவோர வியாபாரிகள் என அனைவரும் நகராட்சியின் குப்பை வாகனங்களில் மக்கும் குப்பை, மக்காத குப்பை, சுகாதாரக் குப்பை, சிறப்பு பராமரிப்பு குப்பை (அபாயகரமான குப்பை) என நான்கு வகைகளாகப் பிரித்து குப்பைகளைக் கொடுக்க வேண்டும். குப்பைகளைப் பிரித்துக் கொடுக்காத வீடுகள் மற்றும் வணிகப் பகுதிகளிலிருந்து குப்பைகள் பெறப்படாது என்றும், இந்த விதிகளை மீறுவோருக்கு நகராட்சி மூலம் கடும் அபராதம் விதிக்கப்படும் என்றும் ஆணையர் பாலமுருகன் கூறினார்.
மேலும், கழிவுநீர் கால்வாய்கள், பொது இடங்கள், தெருக்கள், அனைத்து மத வழிபாட்டுத் தலங்கள் அமைந்துள்ள பகுதிகள், ஆறுகள், நீர்நிலைப் பகுதிகள், பேருந்து நிலையங்கள் மற்றும் ரயில் நிலையங்கள் போன்ற பொது இடங்களில் குப்பைகளை வீசக்கூடாது என்றும் அவர் வலியுறுத்தினார். பொதுக்கழிப்பிடங்கள் மற்றும் சமுதாயக் கழிப்பிடங்களில் புகைப்பிடிப்பது தடை செய்யப்பட்டுள்ளதுடன், மீறினால் அபராதம் விதிக்கப்படும் என்றும் அவர் எச்சரித்தார்.
அவிநாசி நகராட்சிக்குட்பட்ட அனைத்து வார்டுகளிலும் உள்ள வீடுகளில் பொதுமக்கள் குப்பைகளை நான்கு வகைகளாகச் சரியாகத் தரம் பிரித்துக் கொடுத்தால், அவர்களுக்கு சிறப்புப் பரிசு மற்றும் பாராட்டுச் சான்றிதழ் வழங்கி கௌரவிக்கப்படும் என ஆணையர் அறிவித்தார். குப்பைகளை வகைகளாகப் பிரித்துத் தருவதை மேற்கொள்ளும் மாணவ, மாணவிகள் அந்தந்தப் பகுதியின் தூய்மைத் தூதுவர்களாக நியமிக்கப்படுவார்கள் என்றும் அவர் தெரிவித்தார்.
எனவே, குப்பைகளை ஒன்றாகக் கலக்காமல், நான்கு வகைகளாகப் பிரித்து வழங்கி, அவிநாசி நகராட்சியைத் தூய்மையான நகராட்சியாக மாற்ற பொதுமக்கள் முழு ஒத்துழைப்பு அளிக்க வேண்டும் என ஆணையர் பாலமுருகன் கேட்டுக்கொண்டார்.
