2026ஆம் ஆண்டு நடைபெறவுள்ள ஆசிய விளையாட்டுப் போட்டிகளுக்கான ஆப்கானிஸ்தான் கிரிக்கெட் அணி அறிவிக்கப்பட்டுள்ளது. இந்த 15 பேர் கொண்ட அணியில், ஆப்கானிஸ்தானின் முன்னாள் கேப்டனும் நட்சத்திர ஆல்-ரவுண்டருமான முகமது நபியின் 20 வயது மகன் ஹசன் ஈசகில் இடம்பிடித்துள்ளார். இது பலருக்கும் ஆச்சரியத்தை அளித்துள்ளது.
ஹசன் ஈசகில் ஒரு டாப்-ஆர்டர் பேட்ஸ்மேன் ஆவார். இவர் இதுவரை ஆப்கானிஸ்தான் சீனியர் அணிக்காக சர்வதேச போட்டிகளில் விளையாடிய அனுபவம் இல்லை. இருப்பினும், டி20 கிரிக்கெட்டில் 41 போட்டிகளில் விளையாடி 1094 ரன்கள் குவித்துள்ளார். இந்த ஆசிய விளையாட்டுப் போட்டிக்கான அணியில் இடம்பெறுவது அவரது முதல் தேசிய அணியில் இடம் பெறுவதாகும்.
ஆப்கானிஸ்தானின் நட்சத்திர சுழற்பந்து வீச்சாளர் ரஷித் கான், இப்ராஹிம் சத்ரான், ரஹ்மானுல்லா குர்பாஸ், அஸ்மத்துல்லா உமர்சாய் மற்றும் அல்லா கசன்பர் போன்ற முக்கிய வீரர்கள் இந்த அணியில் இடம்பெறவில்லை. அவர்களுக்கு இந்தத் தொடரில் ஓய்வு அளிக்கப்பட்டுள்ளது. இந்த முடிவு பலரையும் வியப்பில் ஆழ்த்தியுள்ளது.
இந்த ஆசிய விளையாட்டுப் போட்டிக்கான ஆப்கானிஸ்தான் அணியை தர்விஷ் ரசூலி வழிநடத்துவார். அணியில் கரீம் ஜனத், நஜிபுல்லா சத்ரான் போன்ற அனுபவம் வாய்ந்த வீரர்களும் இடம்பெற்றுள்ளனர். பிற நாடுகள் தங்களது முழு பலம் வாய்ந்த அணிகளை அறிவித்துள்ள நிலையில், ஆப்கானிஸ்தான் தனது முன்னணி வீரர்களுக்கு ஓய்வு அளித்து அணியை அறிவித்துள்ளது குறிப்பிடத்தக்கது.
ஆசிய விளையாட்டுப் போட்டியில் இந்திய அணியை தற்போதைய டி20 கேப்டன் ஸ்ரேயாஸ் ஐயர் வழிநடத்துவார். இந்திய அணியில் வைபவ் சூர்யவன்ஷி, அபிஷேக் சர்மா, சஞ்சு சாம்சன், ஜஸ்பிரித் பும்ரா மற்றும் அர்ஷ்தீப் சிங் போன்ற முன்னணி வீரர்கள் இடம்பெற்றுள்ளனர். பாகிஸ்தான் அணி சாகிப்ஜாதா ஃபர்ஹான் தலைமையில் களமிறங்குகிறது. அந்த அணியில் சைம் அயூப், அப்ரார் அகமது, உஸ்மான் கான், சுஃபியான் முகீம், மாஸ் சதாகத் மற்றும் ஹசன் நவாஸ் ஆகியோர் இடம்பெற்றுள்ளனர்.
கடந்த 2023ஆம் ஆண்டு நடைபெற்ற ஆசிய விளையாட்டுப் போட்டியில், ஆப்கானிஸ்தான் அணி ஆண்கள் கிரிக்கெட்டில் வெள்ளிப் பதக்கம் வென்றது. அரையிறுதியில் பாகிஸ்தானை வீழ்த்தி இறுதிப்போட்டிக்கு முன்னேறிய ஆப்கானிஸ்தான் அணிக்கு, இந்தியாவுக்கு எதிரான இறுதிப்போட்டி மழையினால் கைவிடப்பட்டதால் இரண்டாவது இடமே கிடைத்தது.
ஆசிய விளையாட்டுப் போட்டிக்கான ஆப்கானிஸ்தான் அணி வீரர்கள் பட்டியல் இதோ:
தர்விஷ் ரசூலி (கேப்டன்), முகமது இஷாக் (விக்கெட் கீப்பர்), முகமது அக்ரம், ஹசன் ஈசகில், காலித் தனிவால், இம்ரான் மிர், பைசல் கான் ஷினோசாடா, நஜிபுல்லா சத்ரான், ஃபர்மனுல்லா சாபி, இஸ்மத் ஆலம், கரீம் ஜனத், நங்யால் கரோட்டி, அரப் குல் மொமண்ட், ஃபரிதூன் தாவூத்சை, அப்துல்லா அகமத்சை.
