மகாராஷ்டிர மாநிலம் சத்ரபதி சம்பாஜிநகரில் உள்ள தனது இல்லத்தில் செய்தியாளர்களைச் சந்தித்த 30 வயதான இளைஞர் இயக்கத் தலைவர் அபிஜித் தீப்கே, மத்திய உள்துறை அமைச்சகத்தின் நேரடி உத்தரவு இன்றி காவல்துறை அப்பாவி மாணவர்கள் மீது தடிச்சார்ஜ் நடத்தவும், பெல்லட் குண்டுகளைப் பயன்படுத்தவும் செயல்பட்டிருக்க முடியாது என்று குற்றம் சாட்டினார்.
“எங்கள் மீது தாக்குதல் நடத்தப்பட்ட விதம் மற்றும் மாணவர்கள் ரத்தம் சிந்திய சம்பவங்கள் அனைத்தும் அமித் ஷாவின் நேரடிப் பார்வையிலேயே நடந்துள்ளன. எனவே மக்களவை எதிர்க்கட்சித் தலைவர் ராகுல் காந்தி எழுப்பியுள்ள அமித் ஷாவின் ராஜினாமா கோரிக்கையை நான் முழுமையாக ஆதரிக்கிறேன்” என்று அபிஜித் தீப்கே தெரிவித்தார்.
மேலும் தனது பேட்டியில் டெல்லி காவல்துறையின் செயல்பாடுகளைக் கடுமையாகச் சாடிய தீப்கே, “போராட்டம் நடத்திய மாணவர்கள் மீது கல்வீச்சுப் பழியைப் போடுவதற்காக ஜூலை 19 மற்றும் 20 ஆகிய தேதிகளில் டெல்லி காவல்துறையே கற்கள் நிரப்பப்பட்ட லாரிகளையும், சேதமடைந்த வாகனங்களையும் போராட்டக் களத்திற்கு அருகில் கொண்டு வந்து நிறுத்தியதை நான் நேரில் பார்த்தேன். நாட்டின் காவல்துறை அரசியலமைப்பிற்கு உட்பட்டுச் செயல்பட வேண்டுமே தவிர, ஆளுங்கட்சியின் வாட்ஸ்அப் தகவல்களுக்கு ஏற்ப இயங்கக் கூடாது” எனக் காரசாரமாக விமர்சித்தார்.
நாட்டின் ஜனநாயக அமைப்புகளும், மத்திய புலனாய்வு முகமைகளும் ஆளுங்கட்சியின் அதிகார அரசியலுக்காகப் பயன்படுத்தப்பட்டு வருவதாக அவர் கூறினார். கல்வித் துறை மற்றும் மாணவர்களின் எதிர்காலத்தைப் பாதுகாக்கும் இந்தப் போராட்டத்தில் விவசாயிகள் மற்றும் பொதுமக்களின் ஆதரவு தொடர்ந்து நீடிக்கும் என்றும் அவர் உறுதியளித்தார்.
மாணவர்களின் அமைதியான போராட்டத்தை வன்முறை மூலம் ஒடுக்க நினைத்த மத்திய அரசின் இந்த நடவடிக்கை, தேசிய அளவில் பெரும் அரசியல் புயலையும் எதிர்வினைகளையும் ஏற்படுத்தியுள்ளது. இந்தச் சம்பவங்கள் குறித்த ராகுல் காந்தியின் ராஜினாமா கோரிக்கைக்கு அபிஜித் தீப்கே தனது முழு ஆதரவை வெளிப்படுத்தியுள்ளது குறிப்பிடத்தக்கது.
