சென்னை வந்துள்ளார் மத்திய உள்துறை அமைச்சர் அமித் ஷா. நாளை (ஆகஸ்ட் 20) சென்னையில் நடைபெறவிருக்கும் தென் மாநில முதலமைச்சர்கள் மாநாட்டில் பங்கேற்பதற்காக அவர் வருகை தந்துள்ளார்.
மத்திய உள்துறை அமைச்சகத்தின் சார்பில் ஆண்டுதோறும் தென் மாநில முதலமைச்சர்கள் மாநாடு நடத்தப்படுவது வழக்கம். ஆனால், கடந்த 2022 ஆம் ஆண்டுக்குப் பிறகு இந்த மாநாடு நடைபெறவில்லை. இந்நிலையில், 31-வது தென் மாநில முதலமைச்சர்கள் மாநாடு சென்னையை அடுத்த கோவளத்தில் உள்ள ஒரு நட்சத்திர விடுதியில் தொடங்குகிறது.
இந்த மாநாட்டுக்கு மத்திய உள்துறை அமைச்சர் அமித் ஷா தலைமை தாங்குகிறார். தமிழக முதலமைச்சர் விஜய் இந்த மாநாட்டின் துணைத் தலைவராக அறிவிக்கப்பட்டுள்ளார்.
மாநாட்டில் பங்கேற்பதற்காக மத்திய உள்துறை அமைச்சர் அமித் ஷா தனி விமானம் மூலம் இன்று சென்னை வந்தடைந்தார். சென்னை விமான நிலையத்தில் அவருக்கு பாஜகவினர் உற்சாக வரவேற்பு அளித்தனர். விமான நிலையத்தில் இருந்து சாலை மார்க்கமாக அவர் கோவளத்திற்குச் சென்றார்.
மத்திய அமைச்சர் அமித் ஷாவின் வருகையை முன்னிட்டு சென்னையில் பலத்த பாதுகாப்பு ஏற்பாடுகள் செய்யப்பட்டுள்ளன. இந்த மாநாட்டில் பல்வேறு முக்கிய முடிவுகள் எடுக்கப்படும் என எதிர்பார்க்கப்படுகிறது.
