அமேசான் (Amazon) இணையதளத்தில் Samsung Galaxy S25 5G ஸ்மார்ட்போனின் விலை 8 லட்ச ரூபாய்க்கு மேல் காட்டப்பட்டு, பின்னர் 91% தள்ளுபடி என்ற பெயரில் ரூ.69,999-க்கு விற்பனை செய்யப்படுவதாக வெளியாகியுள்ள தகவல் இணையத்தில் வைரலாகி வருகிறது.
தொழில்நுட்பக் கோளாறா?
பொதுவாக ஆன்லைன் வர்த்தக தளங்களில் சில சமயங்களில் தொழில்நுட்ப கோளாறுகள் (Technical Glitch) அல்லது தட்டச்சுப் பிழைகள் காரணமாக விலைப் பட்டியலில் குளறுபடிகள் ஏற்படுவது வழக்கம். அந்த வகையில், தற்போது பிரபல ஆன்லைன் ஷாப்பிங் தளமான அமேசான் இந்தியாவில் மாபெரும் விலை குளறுபடி ஒன்று நடந்துள்ளது.
தற்போது சமூக வலைத்தளங்களில் வைரலாகி வரும் புகைப்படத்தை உற்று நோக்கினால், அதில் Samsung Galaxy S25 5G (Icy Blue, 12GB RAM, 128GB Storage) மாடல் ஸ்மார்ட்போனின் அசல் விலை (MRP) ரூ.8,09,999 என்று அதிர்ச்சியளிக்கும் வகையில் குறிப்பிடப்பட்டுள்ளது.
91% மாபெரும் தள்ளுபடியாம்!
இந்த விலைப்பட்டியலின் படி, அசல் விலையான 8 லட்ச ரூபாயில் இருந்து வாடிக்கையாளர்களுக்கு 91% மாபெரும் தள்ளுபடி வழங்கப்படுகிறதாம். இந்த தள்ளுபடி போக, அந்த ஸ்மார்ட்போன் ரூ.69,999-க்கு விற்கப்படுவதாக அமேசான் தளத்தில் பதிவாகியுள்ளது. பொதுவாக லட்சக்கணக்கில் விற்கப்படும் கார்கள் அல்லது விலைமதிப்பற்ற நகைகளுக்குத்தான் இதுபோன்ற விலை நிர்ணயம் செய்யப்படும். ஆனால், ஒரு ஸ்மார்ட்போனுக்கு இவ்வளவு பெரிய தொகையை அசல் விலையாகக் காட்டியுள்ளது பலரையும் வியப்பில் ஆழ்த்தியுள்ளது.
உண்மையான விலை என்ன?
உண்மையில், இந்த Samsung Galaxy S25 5G (12GB RAM / 128GB) ஸ்மார்ட்போனின் அதிகாரப்பூர்வ அறிமுக விலை சுமார் ரூ.74,999 மட்டுமே. ஜூலை 4 முதல் 6 வரை அமேசான் ப்ரைம் டே (Amazon Prime Day) விற்பனை நடைபெற உள்ள நிலையில், பல எலக்ட்ரானிக் பொருட்களுக்கு சலுகைகள் அறிவிக்கப்பட்டு வருகின்றன. அந்த வகையில், ரூ.74,999 மதிப்புள்ள இந்த போனை தள்ளுபடியில் ரூ.69,999-க்கு விற்பனை செய்வது சாத்தியமான ஒன்றுதான். ஆனால், அசல் விலையை 8 லட்சத்திற்கும் மேல் எனத் தவறுதலாகப் பதிவிட்டதே இந்த ஒட்டுமொத்த குழப்பத்திற்குக் காரணம்.
கலாய்க்கும் நெட்டிசன்கள்:
நெட்டிசன்கள் பலரும், “ஐபோன் கூட இந்த விலைக்கு வராது, சாம்சங் போனுக்கு 8 லட்சமா?”, “சரியான விலையை தள்ளுபடி விலையாகக் காட்ட, 8 லட்ச ரூபாய் எம்.ஆர்.பி என பொய் சொல்ல வேண்டுமா?” என்று அமேசான் நிறுவனத்தை டேக் செய்து கலாய்த்து வருகின்றனர்.
இது ஒரு தொழில்நுட்பப் பிழை என்பதை பலரும் உணர்ந்திருந்தாலும், முன்னணி இ-காமர்ஸ் தளமான அமேசானில் இப்படி ஒரு கவனக்குறைவான பதிவு இடம்பெற்றிருப்பது பேசுபொருளாகியுள்ளது. அமேசான் தரப்பில் இந்த விலைப்பட்டியல் பிழை விரைவில் திருத்தப்படும் என எதிர்பார்க்கப்படுகிறது.
