உத்தரபிரதேச மாநிலம் கான்பூரைச் சேர்ந்த 18 வயது இளைஞர், செயற்கை நுண்ணறிவு (ஏஐ) தொழில்நுட்பத்தைப் பயன்படுத்தி போலியான வங்கி செயலிகளை உருவாக்கிய குற்றச்சாட்டில் குஜராத் காவல்துறையால் கைது செய்யப்பட்டுள்ளார். ரோஹித் வீரேந்திர சிங் என்ற இந்த இளைஞர், 11-ம் வகுப்பு வரை மட்டுமே படித்துள்ளார். பணம் சம்பாதிக்கும் நோக்கில், படிப்பை பாதியிலேயே நிறுத்திவிட்டு சைபர் குற்றவாளிகளுடன் இணைந்து செயல்பட்டு வந்துள்ளார். இவர், சைபர் குற்றவாளிகளுக்கு உதவும் வகையில், குறிப்பாக பஞ்சாப் நேஷனல் வங்கியின் அசல் செயலியைப் போலவே தோற்றமளிக்கும் ஒரு போலி செல்போன் செயலியை உருவாக்கியுள்ளார். இந்த செயலி, பயனர்களின் தகவல்களைத் திருடி பண மோசடி செய்யப் பயன்படுத்தப்பட்டுள்ளது. சூரத்தைச் சேர்ந்த சைபர் கிரைம் பிரிவு காவல்துறையினர் இந்த வழக்கை விசாரித்து வருகின்றனர். சமீபத்தில், இந்த போலி செயலியை பதிவிறக்கம் செய்த சூரத்தைச் சேர்ந்த ஒருவர், தனது வங்கிக் கணக்கிலிருந்து உடனடியாக ரூ.5 லட்சம் மோசடி செய்யப்பட்டதாக புகார் அளித்துள்ளார். இந்த புகாரின் அடிப்படையில் காவல்துறையினர் தீவிர விசாரணை மேற்கொண்டு, ரோஹித் வீரேந்திர சிங்கை கைது செய்துள்ளனர். இவர் ஜார்க்கண்டின் ஜம்தாரா, ஹரியானா, ராஜஸ்தான் ஆகிய பகுதிகளைச் சேர்ந்த சைபர் கிரைம் கும்பல்களுடன் தொடர்பு வைத்திருந்து அவர்களுக்கு உதவியதாகக் கூறப்படுகிறது. இந்த சம்பவம், ஏஐ தொழில்நுட்பத்தின் தவறான பயன்பாடு குறித்த கவலைகளை எழுப்பியுள்ளது.
