துணைப் பொதுச்செயலாளர் பதவி கேட்ட ஆதவ் அர்ஜுனா: எடப்பாடி பழனிசாமி விளக்கம்

அதிமுகவில் துணைப் பொதுச்செயலாளர் பதவி கேட்டு தன்னை அணுகிய பொதுப்பணித்துறை அமைச்சர் ஆதவ் அர்ஜுனாவின் கோரிக்கையை நிராகரித்ததாக அக்கட்சியின் பொதுச்செயலாளர் எடப்பாடி பழனிசாமி தெரிவித்துள்ளார். உழைப்பவர்களுக்கு மட்டுமே அதிமுகவில் பதவி உண்டு என்றும், பதவி விற்பனை செய்யப்படுவதில்லை என்றும் அவர் திட்டவட்டமாக கூறினார்.

சேலத்தில் நடைபெற்ற அதிமுக பொதுக்கூட்டத்தில் எடப்பாடி பழனிசாமி உரையாற்றினார். அப்போது அவர், "ஆதவ் அர்ஜுனா முதலில் திமுகவில் இருந்தார். பின்னர் விசிகவிற்கு சென்றார். அதன் பிறகு என்னை சந்தித்து அதிமுகவில் துணைப் பொதுச்செயலாளர் பதவி கேட்டார். ஆனால், அதிமுக கட்சியில் பதவி விற்பனை செய்யப்படுவதில்லை என்றும், உழைப்பவர்களுக்கு மட்டுமே பதவி என்றும் நான் அவரிடம் கூறினேன். அதன் பிறகு அவர் தவெகவிற்கு சென்று, அந்தக் கட்சியை குத்தகைக்கு எடுத்துவிட்டார்" எனத் தெரிவித்தார்.

மேலும், மேட்டூர் அணை நீர் திறப்பு விழா குறித்து பேசிய எடப்பாடி பழனிசாமி, "மேட்டூர் அணை கட்டப்பட்ட காலத்தில் சுமார் ரூ.4.50 கோடி செலவானது. ஆனால், தற்போது முதலமைச்சர் அந்த நிகழ்ச்சியில் பங்கேற்றதற்கான ஏற்பாடுகளுக்கு மட்டும் ரூ.4.50 கோடி செலவு செய்யப்பட்டுள்ளது. அப்போது முதலமைச்சர் பாட்டிக்கு கண்ணாடி மாட்டிவிட்டு போஸ் கொடுத்துவிட்டு சென்றுவிட்டார்" என்று விமர்சித்தார்.

தமிழக முதலமைச்சர் விஜய்யை எம்ஜிஆருடன் ஒப்பிட்டு பேசிய அவர், "எம்ஜிஆர் என்றால் எம்ஜிஆர் மட்டுமே; அவருக்கு நிகர் யாரும் கிடையாது. முதலமைச்சர் விஜய், எம்ஜிஆர் போல தன்னை நினைத்துக்கொள்கிறார்" என்று கூறினார்.

மின்வெட்டு பிரச்சினை குறித்தும் எடப்பாடி பழனிசாமி கடுமையாக விமர்சித்தார். "தற்போது மின்வெட்டு என்பது மின்பற்றாக்குறை என பெயர் மாற்றப்பட்டுள்ளது. தமிழகத்தில் கடுமையான மின்வெட்டு இருந்த காலத்திலும், ஒரு யூனிட் மின்சாரம் 18 ரூபாய்க்கு கொள்முதல் செய்யப்பட்டது. ஆனால், தற்போது ஒரு யூனிட் மின்சாரம் 30 ரூபாய்க்கு வாங்கப்படுகிறது. இதில் அமைச்சர் சிடிஆர் நிர்மல்குமாருக்கு ஒரு யூனிட்டுக்கு 4 ரூபாய் கமிஷன் செல்வதாக பரவலாக பேசப்படுகிறது. இது லஞ்சம் இல்லையா?" என அவர் கேள்வி எழுப்பினார்.

மேலும், தவெக ஆட்சியின் கீழ் விண்ணை முட்டும் அளவுக்கு விலைவாசி உயர்ந்துள்ளதாகவும் அவர் குற்றம் சாட்டினார். அதிமுகவில் பதவி விற்பனை இல்லை என்ற நிலைப்பாட்டை எடப்பாடி பழனிசாமி மீண்டும் வலியுறுத்தியுள்ளார். ஆதவ் அர்ஜுனாவின் அரசியல் பயணம் மற்றும் தற்போதைய அரசின் செயல்பாடுகள் குறித்தும் அவர் விமர்சனங்களை முன்வைத்தார்.

Author

Fernandez

Senior Reporter

Fernandaz – MDTV 24x7 News நிறுவனத்தின் Senior Reporter மற்றும் General News Writer ஆக பணியாற்றி வருகிறார். அரசியல், சமூக நிகழ்வுகள், மக்கள் பிரச்சினைகள் மற்றும் முக்கிய நடப்பு செய்திகளை துல்லியமாகவும் விரைவாகவும் மக்களிடம் கொண்டு சேர்ப்பதில் அனுபவம் பெற்றவர். நம்பகமான தகவல்களை தரமான செய்திகளாக வழங்கும் நோக்கத்துடன் செய்தித்துறையில் தொடர்ந்து செயல்பட்டு வருகிறார்.