பெல்ஃபாஸ்ட்: அயர்லாந்துக்கு எதிரான இரண்டாவது டி20 போட்டியில் இந்திய வீரர் அபிஷேக் சர்மா களமிறங்க உள்ளார். இந்தப் போட்டியில் அவர் இரண்டு சிக்ஸர்களை அடித்தால், சர்வதேச டி20 கிரிக்கெட் வரலாற்றில் அதிவேகமாக 100 சிக்ஸர்களைக் கடந்த முதல் பேட்டர் என்ற உலக சாதனையை படைப்பார்.
தற்போது, சர்வதேச டி20 போட்டிகளில் அதிவேகமாக 100 சிக்ஸர்களை அடித்த வீரர் என்ற உலக சாதனை ஆஸ்திரியாவின் கரன்பீர் சிங் வசம் உள்ளது. அவர் 813 பந்துகளில் இந்த மைல்கல்லை எட்டினார். ஆனால், அபிஷேக் சர்மா தனது 47 டி20 சர்வதேச போட்டிகளில் விளையாடிய 46 இன்னிங்ஸ்களில், இதுவரை எதிர்கொண்ட 775 பந்துகளில் 98 சிக்ஸர்களை அடித்துள்ளார். எனவே, இன்னும் இரண்டு சிக்ஸர்களை அடித்தால் அவர் இந்த உலக சாதனையை முறியடிப்பார்.
ஒட்டுமொத்த டி20 கிரிக்கெட்டில் அதிவேகமாக 100 சிக்ஸர்களை விளாசிய உலக சாதனை இந்தியாவின் வைபவ் சூர்யவன்ஷி வசம் உள்ளது. இவர் டி20 போட்டிகளில் வெறும் 515 பந்துகளில் 100 சிக்ஸர்களை எட்டியுள்ளார். சர்வதேச டி20 போட்டிகளில் அதிவேகமாக 100 சிக்ஸர்கள் அடித்த பேட்டர்கள் பட்டியலில் வைபவ் சூர்யவன்ஷி முதலிடத்தில் உள்ளார். அவரைத் தொடர்ந்து கரன்பீர் சிங் (813 பந்துகள்), கீரன் பொல்லார்ட் (843 பந்துகள்), ரொமாரியோ ஷெப்பர்ட் (845 பந்துகள்), சீகுகே பிரசன்னா மற்றும் ரக்கீம் கார்ன்வால் (தலா 850 பந்துகள்) ஆகியோர் அடுத்தடுத்த இடங்களில் உள்ளனர்.
அபிஷேக் சர்மா இரண்டு சிக்ஸர்களை அடிக்கும் பட்சத்தில், சர்வதேச டி20 போட்டிகளில் 100 அல்லது அதற்கு மேற்பட்ட சிக்ஸர்களை அடித்த 5-வது இந்திய வீரர் என்ற பெருமையையும் பெறுவார். ஏற்கனவே ரோஹித் சர்மா (205 சிக்ஸர்கள்), சூர்யகுமார் யாதவ் (179 சிக்ஸர்கள்), ஹர்திக் பாண்டியா (126 சிக்ஸர்கள்) மற்றும் விராட் கோலி (124 சிக்ஸர்கள்) ஆகியோர் இந்த மைல்கல்லை எட்டியுள்ளனர். இந்திய அணிக்காக அதிக சிக்ஸர்கள் அடித்தவர்கள் பட்டியலில் ரோஹித் சர்மா முதலிடத்தில் உள்ளார்.
