புனிதமான ஆடி மாத பிறப்பு 2026 ஆம் ஆண்டு ஜூலை 17 ஆம் தேதி, வெள்ளிக்கிழமை அன்று தொடங்குகிறது. இந்த மாதத்தை 'தலை வெள்ளி' என்றும் சிறப்பித்துக் கூறுகின்றனர். தேவர்களுக்கு மார்கழி மாதம் எவ்வளவு விசேஷமோ, அதேபோல மாலை நேரத்தில் வரும் ஆடி மாதமும் சிறப்பு வாய்ந்தது என தேச மங்கையர்க்கரசி தெரிவித்துள்ளார்.
ஆடி மாதம் முழுவதும் அம்மன் வழிபாடு, குலதெய்வ வழிபாடு மற்றும் இயற்கை வழிபாடுகளுக்கு முக்கியத்துவம் அளிக்கப்படுகிறது. குறிப்பாக பெண்கள் செவ்வாய் மற்றும் வெள்ளிக்கிழமைகளில் விரதம் இருந்து அம்மனை வழிபட்டால் குடும்ப நலன், ஆரோக்கியம் மற்றும் வளம் பெருகும் என்பது பக்தர்களின் நம்பிக்கையாக உள்ளது.
"நலன்கள் அனைத்தையும் குறைவின்றி பெறுவதற்காக தான் முன்னோர்கள் இவ்வளவு வழிப்பாட்டையும் வைத்தார்கள்" என்று தேச மங்கையர்க்கரசி தனது விளக்கத்தில் குறிப்பிட்டுள்ளார். ஆடி மாதத்தின் முதல் நாளிலிருந்தே அம்மனை வீட்டிற்கு அழைக்கும் வழிபாடுகளைத் தொடங்க வேண்டும்.
இதற்காக, எவர் சில்வர் அல்லாத ஒரு கலசத்தை எடுத்து, அதில் நூல் அல்லது மஞ்சள் தடவி, தண்ணீர் மற்றும் வேப்பிலை வைக்க வேண்டும். இதை குலதெய்வமாக பாவித்து வழிபாடு செய்ய வேண்டும். மேலும், காலை வேளையில் இரண்டு வாழைப்பழம், வெற்றிலை பாக்கு வைத்து அம்மனை வழிபடலாம்.
கலசம் வைத்து வழிபடுபவர்கள் காலை 4.30 மணி முதல் 5.30 மணிக்குள் வழிபட உகந்த நேரம். அதன்பிறகு, காலை 6:00 மணி முதல் 7:00 மணி வரையிலும், பின்னர் 9:00 மணி முதல் 10:20 மணி வரையிலும் வழிபடலாம். மதியம் அம்மனுக்கு உணவு படைப்பதாக இருந்தால், 1:00 மணியில் இருந்து 2:00 மணிக்குள் வழிபாடு செய்யலாம்.
ஆடி வெள்ளிக்கிழமைகளில் ராகு காலத்தில் (காலை 10:30 முதல் 12 மணி வரை) துர்க்கையை வழிபட்டால் மிகவும் விசேஷமாக இருக்கும். முடிந்தால் அன்று கோயிலுக்குச் சென்று வழிபாடு செய்யலாம். கோயிலுக்குச் செல்ல இயலாதவர்கள் வீட்டிலேயே வழிபாடு செய்யலாம்.
"இதை எதுவும் செய்ய முடியவில்லை என்றால் வீட்டில் ஒரு நெய் விளக்கு ஏற்றி வைத்து அபிராமி அந்தாதி 100 பாடல்களையும் முழுவதுமாக படியுங்கள். மிகவும் அற்புதமான பலனை அம்மன் தருவார்" என அவர் கூறியுள்ளார். ஆடி மாதம் மங்களகரமாக இருக்க வேண்டும் என்று நினைப்பவர்கள் காலையில் மஞ்சள், உப்பு வாங்கி வந்து வீட்டில் வைக்கலாம். மேலும், விளக்கு பூஜையும் செய்யலாம்.
முன்னோர்கள் வகுத்தளித்த இந்த வழிபாட்டு முறைகளைப் பின்பற்றி, ஆடி மாதத்தை சிறப்பாகக் கடைப்பிடித்து, அம்மனின் அருளைப் பெற்று நலமுடன் வாழலாம்.
