சென்னை வடக்கு மாவட்டம் சார்பில் பழனி ஆண்டவர் கோயில் தெரு, பெரம்பூரில் நடைபெற்ற மாபெரும் கண்டன பொதுக்கூட்டத்தில் திமுக அமைப்பு செயலாளர் ஆர்.எஸ்.பாரதி உரையாற்றினார். இந்த கூட்டத்தில் அவர் பேசுகையில், 'தமிழகம் சீரழிந்து கொண்டிருக்கிறது. மக்களுக்கு பாதுகாப்பில்லை. மது கிண்ணத்தில் விழுந்த வண்டு போல மக்கள் இன்னும் மயக்கத்தில் தான் இருக்கிறார்கள். தற்போது மின் கட்டண உயர்வைக் கண்டு மக்களுக்கு சற்று சுயநினைவு வந்துள்ளது. திமுகவுக்கு வாக்களிக்கவில்லை என்றால், இந்த நாட்டை விட்டு வெளியேற வேண்டிய நிலைக்கு மக்கள் தள்ளப்படுவார்கள் என்பதை அவர்கள் உணர்ந்திருக்கிறார்கள்' என்று அவர் குறிப்பிட்டார்.
முன்னதாக, 'முன்பு குடிநீர் தட்டுப்பாடு ஏற்பட்டால் உடனடியாக சரி செய்தோம். படகோட்டி திரைப்படத்தைப் பார்த்து மக்கள் எம்.ஜி.ஆருக்கு வாக்களித்தனர். அப்போது சில நடவடிக்கைகளால் எட்டு மீனவர்கள் கொல்லப்பட்டனர். பெரம்பூர் தொகுதியில் அனைத்து வசதிகளுடன் கூடிய மிகப் பெரிய திருமண மண்டபத்தை திமுக ஆட்சியில் கட்டிக் கொடுத்திருக்கிறோம். ஆனால், ஏசி பேருந்து நிலையத்தை ஏன் கட்டிக் கொடுத்தீர்கள்? தற்போது கஞ்சா போதை ஆசாமிகள் தான் அதை பயன்படுத்துகிறார்கள்' என்றும் அவர் விமர்சித்தார்.
மேலும், 'பார்த்து பார்த்து பல்வேறு மக்கள் நலத்திட்டங்களை நாங்கள் கொண்டு வந்தோம். எதிர்க்கட்சித் தலைவர் உதயநிதி ஸ்டாலின் கேட்ட கேள்விக்கு பதிலளிக்காமல், முதலமைச்சர் மூன்று நாட்கள் அவகாசம் வாங்கிச் சென்றார். மக்கள் செய்த தவறால் ஆட்சியில் அமர்ந்து கொண்டு, மிசா சட்டத்தால் ஸ்டாலின் உள்ளிட்டோரின் தியாகத்தை கொச்சைப்படுத்தாதீர்கள், பழித்துப் பேசாதீர்கள். சிங்கப்படை அமைத்தவர்கள், பெண் போலீசிடம் சிலிமிஷம் செய்கிறார்கள். தமிழகம் சீரழிந்து கொண்டிருக்கிறது, பாதுகாப்பில்லை. விலைவாசி விண்ணை முட்டுகிறது. மதுராந்தகம் மற்றும் தாராபுரம் ஆகிய இரண்டு தொகுதிகளிலும் நமக்கு வெற்றி கிடைக்கும்' என்று ஆர்.எஸ்.பாரதி தெரிவித்தார்.
முன்னதாக, சைதாப்பேட்டையில் முன்னாள் அமைச்சர் மா.சுப்பிரமணியனை தோற்கடித்த மக்களுக்கு நல்ல சாவு கூட வரமாட்டாது என ஆர்.எஸ்.பாரதி சாபமிட்டிருந்தது பெரும் பரபரப்பை ஏற்படுத்திய நிலையில், தற்போது மீண்டும் சர்ச்சைக்குரிய வகையில் அவர் பேசியுள்ளது குறிப்பிடத்தக்கது.
