நமது முன்னோர்களின் காலத்தில் பெண்கள் தினமும் மஞ்சள் பூசி குளிப்பதை வழக்கமாகக் கொண்டிருந்தனர். குறிப்பாக கஸ்தூரி மஞ்சள் தூளை முகம், கை, கால்களில் குழைத்துப் பூசி குளிப்பதால் சருமம் நல்ல பொலிவுடன் காணப்படும் என்றும், முகப்பருக்கள் மற்றும் கரும்புள்ளிகள் போன்ற பிரச்சனைகள் ஏற்படாது என்றும் நம்பப்பட்டது.
தற்காலத்தில் சந்தையில் எண்ணிலடங்கா செயற்கை அழகு சாதனப் பொருட்கள் விற்பனைக்கு வந்தாலும், பல பெண்கள் வயது வித்தியாசமின்றி முகப்பரு, கரும்புள்ளி, ஹார்மோன் மாற்றங்களால் ஏற்படும் லேசான மீசை முடி போன்ற பிரச்சனைகளால் அவதிப்படுகின்றனர். இத்தகைய சூழலில், மஞ்சளைப் பயன்படுத்துவதன் மூலம் குறுகிய நாட்களிலேயே நல்ல பலன் கிடைப்பதை அறியலாம்.
குறிப்பாக, கஸ்தூரி மஞ்சளை குளியல் பொடியுடன் சேர்த்து அரைத்துப் பயன்படுத்துவது சருமத்திற்கு நன்மை பயக்கும். மாதவிடாய் காலங்களுக்கு முன்பு சிலருக்கு முகத்தில் சிறு சிறு பருக்கள் அல்லது கட்டிகள் உருவாகும். பகல் நேரங்களில் இல்லாவிட்டாலும், இரவு நேரங்களில் மஞ்சளைக் குழைத்துப் பூசி வந்தால், பருக்கள் உருவாவது தடுக்கப்படும்.
அம்மை தழும்புகள், கரும்புள்ளிகள் போன்றவற்றை மறையச் செய்ய, மஞ்சளுடன் சோற்றுக்கற்றாழை நுங்கை (ஜெல்) குழைத்து அந்த இடங்களில் பூசி வந்தால், நாளடைவில் அவை மறைந்து சருமம் இயல்பு நிலைக்குத் திரும்பும். சேற்றுப்புண், பாத எரிச்சல், பாத வெடிப்புகள் போன்ற பிரச்சனைகள் உள்ளவர்கள், சுத்தமான தேங்காய் எண்ணெயில் மஞ்சளைக் குழைத்து கால்களில் பூசலாம். இதனால் பாத வெடிப்புகள் நீங்கி பாதம் அழகாகும்.
சருமச் சுருக்கத்தைத் தடுத்து சருமத்தைப் பாதுகாக்கும் மஞ்சள், எண்ணெய் பசை மிகுந்த முகத்தைக் கொண்ட பெண்களுக்கு ஒரு வரப்பிரசாதமாகும். விலை உயர்ந்த க்ரீம்கள் செய்யக்கூடிய வேலையை, பால் மற்றும் தேனுடன் கலந்து பூசப்படும் மஞ்சள் எளிதாகச் செய்துவிடுகிறது. தினமும் முகத்திற்கு மஞ்சளுடன் சிறிது கடலை மாவு மற்றும் பால் ஏடு சேர்த்துத் தடவி வந்தால், முகம் பளபளப்பதோடு, முகத்தில் உள்ள கருமை மற்றும் காயங்களும் நீங்கும்.
மேலும், மஞ்சளை சிறிது எலுமிச்சை சாறில் தேய்த்து, முகத்தில் பருக்கள் உண்டாகும் இடங்களில் தடவினால், அவை ஆரம்பத்திலேயே உண்டாவதைத் தடுக்கலாம். மஞ்சளுடன் சிறிது வேப்பிலையை அரைத்துத் தேய்த்தால், அம்மையால் ஏற்பட்ட தழும்புகளும் மறையும். இவ்வாறு இயற்கையான முறையில் மஞ்சளைப் பயன்படுத்துவது சருமப் பிரச்சனைகளுக்கு சிறந்த தீர்வாக அமைகிறது.
