தமிழகத்தில் சட்டம் ஒழுங்கு நிலைமை மிகவும் மோசமடைந்து வருவதாகவும், மாநிலம் கூலிப்படையினரின் கூடாரமாக மாறி வருவதாகவும் பாஜக மூத்த தலைவர் வானதி சீனிவாசன் குற்றம் சாட்டியுள்ளார்.
செங்கல்பட்டு அருகே பெட்ரோல் பங்க் ஒன்றில் இளைஞர் ஒருவர் 6 பேர் கொண்ட கும்பலால் கொடூரமாக வெட்டிக் கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. இதுகுறித்து வானதி சீனிவாசன் வெளியிட்டுள்ள அறிக்கையில், "சில ஆண்டுகளுக்கு முன்பு வரை கூலிப்படையினரின் அட்டகாசம் குறைந்திருந்தது. ஆனால் தற்போது அவர்கள் கொலைகள் மற்றும் கொடுங்குற்றங்களை சர்வ சாதாரணமாக அரங்கேற்றி வருகின்றனர். இது தமிழகத்தில் சட்டம் ஒழுங்கு பாதாளத்திற்குச் சென்றுவிட்டதையே காட்டுகிறது," என்று குறிப்பிட்டுள்ளார்.
சட்டம் ஒழுங்கைக் காக்க வேண்டிய முதல்வர், சினிமா படப்பிடிப்புக்குச் செல்வது போல லண்டன் சென்று அங்கு ரீல்ஸ் பதிவிட்டு வருவதாக வானதி சீனிவாசன் விமர்சித்துள்ளார். தமிழகத்தில் தொடரும் கொலைகளாலும், பெண்களுக்கு ஏற்படும் பாதுகாப்பின்மையாலும் மக்கள் அச்சத்தில் உறைந்துள்ளனர். இத்தகைய சூழலில், முதல்வர் விஜய் தனக்கும் சட்டம் ஒழுங்கிற்கும் எந்த சம்பந்தமும் இல்லாதது போல செயல்படுவது கடும் அதிருப்தியை அளிப்பதாகவும் அவர் தெரிவித்துள்ளார்.
"உங்கள் நண்பர்களுக்கும், தம்பி தங்கைகளுக்கும் நீங்கள் கொடுக்க நினைத்த மாற்றம் இதுதானா தமிழக முதல்வர் அவர்களே? வெறும் அறிக்கைகளை வெளியிடுவதால் மட்டும் தமிழகத்தில் சட்டம் ஒழுங்கு சரியாகாது," என வானதி சீனிவாசன் குறிப்பிட்டுள்ளார்.
காவல்துறையைக் கையில் வைத்திருக்கும் முதல்வர், கடுமையான நடவடிக்கைகளை உடனடியாக அமல்படுத்தி, கூலிப்படையினரையும் ரவுடியிசத்தையும் ஒழித்து மாநிலத்தில் அமைதியை நிலைநாட்ட வேண்டும் என்றும் அவர் வலியுறுத்தியுள்ளார். தமிழகத்தில் சட்டம் ஒழுங்கு சீர்குலைந்துள்ளதாகவும், இது குறித்து முதல்வர் உடனடியாக கவனம் செலுத்த வேண்டும் என்றும் அவர் கேட்டுக்கொண்டுள்ளார்.
