நாகப்பட்டினம் மற்றும் இலங்கையின் காங்கேசன்துறை இடையேயான முக்கிய கப்பல் போக்குவரத்து, பாதுகாப்பு மற்றும் விதிமுறை ஆய்வுகள் காரணமாக ஆகஸ்ட் 11 ஆம் தேதி வரை தற்காலிகமாக ரத்து செய்யப்பட்டுள்ளது. இந்த திடீர் அறிவிப்பால் பயணிகள் மத்தியில் பெரும் ஏமாற்றம் நிலவுகிறது.
இந்த கப்பல் சேவை கடந்த 2023 ஆம் ஆண்டு முதன்முதலில் தொடங்கப்பட்டது. எனினும், ஆரம்பத்தில் பயணிகளிடையே போதிய வரவேற்பு இல்லாததால் சேவை நிறுத்தப்பட்டது. பின்னர், 2024 ஆம் ஆண்டில் 'சிவகங்கை' என்ற பெயரில் சுபம் தனியார் கப்பல் நிறுவனம் இந்த சேவையை மீண்டும் தொடங்கியது. பயணிகளிடையே நல்ல வரவேற்பு கிடைத்ததையடுத்து, செவ்வாய்க்கிழமைகளை தவிர்த்து மற்ற நாட்களில் இந்த கப்பல் போக்குவரத்து இயக்கப்பட்டு வந்தது.
முன்னதாக, மோசமான வானிலை காரணமாக ஒரு நாள் மட்டும் இந்த சேவை நிறுத்தப்பட்டது. நேற்று விடுமுறை என்பதால், இன்று (புதன்கிழமை) முதல் கப்பல் சேவை மீண்டும் தொடங்கும் என பயணிகள் மிகுந்த ஆவலுடன் எதிர்பார்த்து காத்திருந்தனர். ஆனால், எதிர்பாராத விதமாக இந்த அறிவிப்பு வெளியாகியுள்ளது.
வணிக கடல்சார் துறை அதிகாரிகள், சென்னையில் இருந்து நாகப்பட்டினம் வந்து, இலங்கைக்கு இயக்கப்படும் கப்பல்களின் பாதுகாப்பு, ஆய்வு சான்றிதழ்கள் மற்றும் விதிமுறைகள் குறித்து விரிவான ஆய்வை மேற்கொண்டனர். இந்த ஆய்வின் போது, கப்பல்களில் சில குறைபாடுகள் கண்டறியப்பட்டதாக தகவல்கள் தெரிவிக்கின்றன.
இந்த குறைபாடுகளை சரிசெய்யும் வரை கப்பல் சேவையை தொடர அனுமதிக்க முடியாது என சென்னை வணிக கடல்சார் துறை சார்பில் கடிதம் வழங்கப்பட்டுள்ளதாக தெரிகிறது. இதன் காரணமாக, தற்போது கப்பல்களில் அவசர சீரமைப்பு பணிகள் நடைபெற்று வருகின்றன.
சீரமைப்பு பணிகள் அனைத்தும் நிறைவடைந்த பின்னரே, ஆகஸ்ட் 11 ஆம் தேதிக்கு பிறகு பயணிகள் சேவை மீண்டும் தொடங்கும் என எதிர்பார்க்கப்படுகிறது. அதுவரை, நாகப்பட்டினம் – இலங்கை காங்கேசன் துறை இடையேயான திட்டமிடப்பட்ட அனைத்து பயணங்களும் ஆகஸ்ட் 11 ஆம் தேதி வரை ரத்து செய்யப்பட்டுள்ளன.
குறைபாடுகள் தொடர்பான பணிகள் அனைத்தும் முடிவடைந்தவுடன் கப்பல் சேவை மீண்டும் தொடங்கப்படும் என்றும், பணிகளின் தற்போதைய நிலை மற்றும் சேவை தொடங்கும் தேதி குறித்த மேலதிக தகவல்கள் ஆகஸ்ட் 11 ஆம் தேதிக்குப் பிறகு அறிவிக்கப்படும் என்றும் கப்பல் நிர்வாகம் சார்பில் தெரிவிக்கப்பட்டுள்ளது. இந்த அறிவிப்பால், பயணச்சீட்டுகளை முன்பதிவு செய்திருந்த பயணிகள் பெரும் சிரமத்திற்கு ஆளாகியுள்ளனர்.
