கொல்கத்தா ஈடன் கார்டன் மைதானத்தில் நேற்று நடந்த ஐபிஎல் 2026 போட்டி, சர்வதேச டி20 கிரிக்கெட் வரலாற்றில் ஒரு அரிய சாதனையைப் படைத்துள்ளது. இதுவரை உலகம் முழுவதும் விளையாடப்பட்ட 16,776 டி20 போட்டிகளில் இப்படி ஒரு நிகழ்வு நடந்ததில்லை. இந்த ஆட்டத்தில் இரு அணிகளைச் சேர்ந்த தலா 3 வீரர்கள் என மொத்தம் 6 பேட்ஸ்மேன்கள் 50 ரன்களுக்கு மேல் குவித்தது ஒரு உலக சாதனை!
முதலில் பேட்டிங் செய்த கொல்கத்தா நைட் ரைடர்ஸ் அணி, 20 ஓவர்களில் 247 ரன்கள் என்ற மிகப்பெரிய ஸ்கோரை எடுத்தது. பின்னர் களமிறங்கிய குஜராத் டைட்டன்ஸ் அணி, 218 ரன்கள் எடுத்துப் போராடி 29 ரன்கள் வித்தியாசத்தில் தோல்வியைத் தழுவியது. இருப்பினும், இந்த ஆட்டம் பேட்ஸ்மேன்களின் அதிரடியால் ரசிகர்களை வெகுவாகக் கவர்ந்தது.
கொல்கத்தா அணியில், ஃபின் ஆலன் 35 பந்துகளில் 93 ரன்களும், அங்கிரிஷ் ரகுவன்ஷி 44 பந்துகளில் 82 ரன்களும், கேமரூன் கிரீன் 28 பந்துகளில் 52 ரன்களும் விளாசினர். குஜராத் அணியில், கேப்டன் சுப்மன் கில் 49 பந்துகளில் 85 ரன்களும், ஜோஸ் பட்லர் 35 பந்துகளில் 57 ரன்களும், தமிழக வீரர் சாய் சுதர்சன் 28 பந்துகளில் 53 ரன்களும் குவித்து அசத்தினர். இப்படி 6 வீரர்கள் அரைசதம் அடித்ததுதான் இந்த வரலாற்றுச் சிறப்புக்குக் காரணம்.
டி20 கிரிக்கெட் வரலாற்றில் இதுவரை 16,776 போட்டிகள் நடந்துள்ளன. அதில் 16,124 போட்டிகள் முடிவடைந்துள்ளன. ஆனால், இந்த 16,776 போட்டிகளிலும் ஒரே ஆட்டத்தில் 6 வீரர்கள் 50 ரன்களுக்கு மேல் எடுத்ததில்லை என்பது குறிப்பிடத்தக்கது. இது ஐபிஎல் 2026 தொடரின் இந்த ஆட்டத்தின் தனிச்சிறப்பு. மேலும், குஜராத் அணியின் சாய் சுதர்சன், டி20 கிரிக்கெட்டில் மிகக் குறைந்த இன்னிங்ஸ்களில் (78 இன்னிங்ஸ்) 3,000 ரன்களைக் கடந்த வீரர் என்ற உலக சாதனையையும் படைத்துள்ளார். இதற்கு முன் ஆஸ்திரேலியாவின் ஷான் மார்ஷ் 85 இன்னிங்ஸ்களில் இந்த சாதனையை படைத்திருந்தார்.
