வழக்கறிஞர் ஒருவர் தனக்கு 'சீனியர் அட்வகேட்' அங்கீகாரம் கோரி உச்ச நீதிமன்றத்தில் மனு தாக்கல் செய்திருந்தார். இந்த மனுவை விசாரித்த தலைமை நீதிபதி சூர்யகாந்த், சில கருத்துக்களைத் தெரிவித்தார். 'சில வேலையற்ற இளைஞர்கள் கரப்பான் பூச்சிகள் போலவும், ஒட்டுண்ணிகள் போலவும் செயல்படுகிறார்கள். சமூக ஊடகங்களில் அமைப்புக்கு அழுத்தம் கொடுக்கிறார்கள். இங்கு பலரின் சட்டப் பட்டங்கள் சரிபார்க்கப்பட வேண்டும்' என்று அவர் கூறியதாக செய்திகள் வெளியாகின.
மேற்கூறிய வழக்கறிஞர், சீனியர் அட்வகேட் அங்கீகாரம் பெறுவதற்காக சமூக ஊடகங்களில் தொடர்ந்து பதிவிட்டு வந்ததாகவும், தகவல் அறியும் உரிமைச் சட்டத்தைப் பயன்படுத்தி அழுத்தம் கொடுத்ததாகவும் கூறப்படுகிறது. இதனால் கோபமடைந்த தலைமை நீதிபதி, இப்படிப்பட்ட நபர்களைக் கண்டித்தே மேற்கண்ட கருத்துக்களைத் தெரிவித்ததாகக் கூறப்படுகிறது. இருப்பினும், இந்த கருத்துக்கள் பொதுவாக வேலையில்லாத இளைஞர்களை விமர்சிப்பதாக குற்றச்சாட்டு எழுந்தது.
இந்நிலையில், இதுகுறித்து தலைமை நீதிபதி சூர்யகாந்த் விளக்கம் அளித்துள்ளார். ஒரு நிகழ்ச்சியில் பேசிய அவர், 'எனது கருத்துக்களை ஊடகங்களின் ஒரு பிரிவினர் தவறாகச் சித்தரித்து வெளியிட்டது கண்டு மிகுந்த வேதனை அடைந்தேன். நாட்டின் இளைஞர்களைக் கரப்பான் பூச்சிகள் என்று நான் விமர்சித்ததாகக் கூறுவது முற்றிலும் ஆதாரமற்றது' என்று தெரிவித்தார்.
மேலும் அவர், 'போலிப் பட்டங்களைப் பயன்படுத்தி வழக்கறிஞர் போன்ற உன்னதமான தொழில்களுக்குள் நுழைபவர்களை மட்டுமே நான் குறிப்பாக விமர்சித்தேன். இத்தகைய நபர்கள்தான் ஊடகங்கள், சமூக வலைதளங்கள் மற்றும் பிற மதிப்புமிக்க துறைகளுக்குள்ளும் ஊடுருவுகிறார்கள். அதனால்தான் இவர்களை ஒட்டுமொத்த சமூக அமைப்பையும் சுரண்டும் ஒட்டுண்ணிகள் என்று சாடினேன். இந்திய இளைஞர்கள் மீது எனக்கு அளவற்ற மதிப்பு உண்டு. அவர்களை வளர்ந்த இந்தியாவின் மிக முக்கியத் தூண்களாகவே நான் கருதுகிறேன்' என்றும் அவர் விளக்கமளித்துள்ளார்.
