17 ஆண்டுகளுக்குப் பிறகு, மதுரை மீனாட்சி அம்மன் திருக்கோயிலில் மாபெரும் கும்பாபிஷேக விழா செப்டம்பர் 17 ஆம் தேதி கோலாகலமாக நடைபெற உள்ளது. இந்த வரலாற்று சிறப்புமிக்க நிகழ்வுக்காக பக்தர்கள் அனைவரும் ஆவலுடன் காத்திருக்கின்றனர்.
முன்னதாக, மதுரை மீனாட்சி அம்மன் கோயிலில் கடைசியாக 2009 ஆம் ஆண்டு ஏப்ரல் மாதம் கும்பாபிஷேகம் நடைபெற்றது. ஐதீகத்தின்படி, 12 ஆண்டுகளுக்கு ஒருமுறை கும்பாபிஷேகம் நடத்தப்பட வேண்டும். ஆனால், 2018 ஆம் ஆண்டு பிப்ரவரி 2 ஆம் தேதி கோயிலின் வீரவசந்தராயர் மண்டபத்தில் ஏற்பட்ட தீ விபத்து காரணமாக, திட்டமிடப்பட்ட கும்பாபிஷேகம் நடத்தப்படாமல் போனது.
முந்தைய அதிமுக ஆட்சிக் காலத்தில், கோயிலின் சீரமைப்புப் பணிகள் தொடங்கப்பட்டாலும், கொரோனா பெருந்தொற்று மற்றும் தகுந்த கற்கள் கிடைக்காதது போன்ற காரணங்களால் வீரவசந்தராயர் மண்டபத்தின் சீரமைப்புப் பணிகள் தாமதமாயின. பின்னர், தற்போதைய திமுக ஆட்சிக் காலத்தில், சீரமைப்புப் பணிகள் தீவிரப்படுத்தப்பட்டதுடன், கும்பாபிஷேகத்திற்கான திருப்பணிகளும் தொடங்கப்பட்டன.
இந்த மாபெரும் திருப்பணிகளுக்காக, கோயில் நிதியிலிருந்து ரூ.15.81 கோடியும், உபயதாரர்களிடமிருந்து ரூ.5.16 கோடியும் என மொத்தம் ரூ.32.28 கோடி செலவிடப்பட்டுள்ளது. மேலும், திருப்பணி மற்றும் யாகசாலை பூஜைகளுக்காக உபயதாரர்களிடமிருந்து ரூ.21 கோடி பெறப்பட்டுள்ளது.
17 ஆண்டுகளுக்குப் பிறகு நடைபெறவுள்ள இந்த கும்பாபிஷேக விழா, செப்டம்பர் 17 ஆம் தேதி காலை 7:40 மணி முதல் 8:10 மணிக்குள் வெகுசிறப்பாக நடைபெறும். இதனையொட்டி, செப்டம்பர் 6 ஆம் தேதி காலை 7:00 மணிக்கு கும்பாபிஷேகத்திற்கான பூஜைகள் தொடங்குகின்றன.
செப்டம்பர் 7 ஆம் தேதி காலை 7:00 மணி முதல் 10:00 மணி வரை நவகோள் யாகவேள்வி நடைபெறுகிறது. தொடர்ந்து, செப்டம்பர் 8 ஆம் தேதி வாஸ்து சாந்தி, செப்டம்பர் 9 ஆம் தேதி வைகை ஆற்றில் இருந்து புனித நீர் எடுத்தல் மற்றும் மாலை புனித மண் எடுத்தல் நிகழ்ச்சிகள் நடைபெறும். செப்டம்பர் 10 ஆம் தேதி பேரொளி வழிபாடு மற்றும் மாலையில் முளைப்பாரி இடும் நிகழ்வு நடக்கிறது.
செப்டம்பர் 11 ஆம் தேதி மாலை முதல்கால யாகசாலை பூஜை தொடங்குகிறது. தொடர்ந்து, செப்டம்பர் 17 ஆம் தேதி வரை மொத்தம் 12 கால யாகசாலை பூஜைகள் நடைபெறும். இறுதியாக, செப்டம்பர் 17 ஆம் தேதி காலை 7:40 மணிக்கு மீனாட்சி சுந்தரேஸ்வரர் தங்க விமானங்களுக்கும், ராஜகோபுரங்களுக்கும் கும்பாபிஷேகம் நடைபெறும். அதைத் தொடர்ந்து, காலை 7:55 மணிக்கு அம்மன் மூலஸ்தானத்திற்கும், காலை 8:10 மணிக்கு சுந்தரேஸ்வரர் மூலஸ்தானத்திற்கும் கும்பாபிஷேகம் நடத்தப்படும்.
இந்த வரலாற்றுச் சிறப்புமிக்க கும்பாபிஷேக விழாவில் கலந்துகொண்டு இறைவனை தரிசிக்க லட்சக்கணக்கான பக்தர்கள் மதுரையில் குவிவார்கள் என எதிர்பார்க்கப்படுகிறது. நீண்ட இடைவெளிக்குப் பிறகு நடைபெறும் இந்த நிகழ்வு, ஆன்மீகப் பேரொளியாக பக்தர்களின் மனதில் நிறைந்திருக்கும்.
